badal gai hai kuchh aisi hawa zamane ki

badal ga.ī hai kuchh aisī havā zamāne kī

ki aam ho ga.ī aadat nazar churāne kī

ye baat kaash samajhte sabhī chaman vaale

chaman luTā to nahīñ ḳhair āshiyāne kī

unheñ ḳhabar nahīñ vo ḳhud bhī āzmā.e ga.e

jinheñ thī fikr bahut mujh ko āzmāne kī

koī kalī na rahī phir bhī muskurā.e baġhair

sazā agarche muqarrar thī muskurāne kī

huā yahī ki vo takmīl tak pahuñch na sakā

bahut latīf thī tamhīd jis fasāne kī

ik aap hī pe nahīñ munhasir janāb-e-'nazīr'

baḌe baḌoñ ko havā lag ga.ī zamāne kī

badal gai hai kuchh aisi hawa zamane ki

ki aam ho gai aadat nazar churane ki

ye baat kash samajhte sabhi chaman wale

chaman luTa to nahin KHair aashiyane ki

unhen KHabar nahin wo KHud bhi aazmae gae

jinhen thi fikr bahut mujh ko aazmane ki

koi kali na rahi phir bhi muskurae baghair

saza agarche muqarrar thi muskurane ki

hua yahi ki wo takmil tak pahunch na saka

bahut latif thi tamhid jis fasane ki

ek aap hi pe nahin munhasir janab-e-'nazir'

baDe baDon ko hawa lag gai zamane ki