badal ke humne tariqa KHat-o-kitabat ka

badal ke ham ne tarīqa ḳhat-o-kitābat kā

chhupā liyā hai zamāne se raaz ulfat kā

purānā zaḳhm nayā ho gayā to kyā hogā

na pheñko tiir hamārī taraf ko nafrat kā

bahār aa.ī thī chehre pe chaar din ke liye

nasha hai aaj bhī āñkhoñ meñ us latāfat kā

kabhī to aao hamāre ġharīb-ḳhāne par

hameñ bhī dījiyo mauqa' janāb ḳhidmat kā

bahut sambhāl ke rakhnā use hifāzat se

khilaunā TuuT na jaa.e mirī mohabbat kā

ye musht-e-ḳhāk jo insān kī haqīqat hai

tamāshā dekh rahā huuñ maiñ is kī fitrat kā

hamāre zarf ko nazroñ se tol kar 'ārif'

uThā rahā hai vo tūfān ik qayāmat kā

badal ke hum ne tariqa KHat-o-kitabat ka

chhupa liya hai zamane se raaz ulfat ka

purana zaKHm naya ho gaya to kya hoga

na phenko tir hamari taraf ko nafrat ka

bahaar aai thi chehre pe chaar din ke liye

nasha hai aaj bhi aankhon mein us latafat ka

kabhi to aao hamare gharib-KHane par

hamein bhi dijiyo mauqa' janab KHidmat ka

bahut sambhaal ke rakhna use hifazat se

khilauna TuT na jae meri mohabbat ka

ye musht-e-KHak jo insan ki haqiqat hai

tamasha dekh raha hun main is ki fitrat ka

hamare zarf ko nazron se tol kar 'arif'

uTha raha hai wo tufan ek qayamat ka