badan-e-yar ki bu-bas uDa lae hawa

badan-e-yār kī bū-bās uḌā laa.e havā

jaan aa.e jo vahāñ ho ke yahāñ aa.e havā

badan-e-yār ko bas chhū ke na itrā.e havā

itr kī ban ke lipaT mujh se lipaT jaa.e havā

un ke kūche meñ ġhubār apnā uḌā kar le jaa.e

mujh pe ehsān kare mere bhī kaam aa.e havā

ho havā-dār savārī kā mire dosh-e-sabā

nā-tavāñ vo huuñ ki us tak mujhe pahuñchā.e havā

bañdh ga.ī baaġh meñ terī to havā bād-e-sabā

un ke kūche meñ mirī aah kī bañdh jaa.e havā

ik nigah bād-e-havā.ī bhī tumhārī hai sitam

jaan is tīr-e-havā.ī se na ho jaa.e havā

kyuuñ na ho bād-e-bahārī mujhe ye farmā.ish

kyuuñ na bāñdhūñ maiñ havā yaar jo bandhvā.e havā

kitnī nāzuk vo parī hai ki havā-dār us kā

sūrat-e-taḳht-e-sulaimāñ rahā bālā-e-havā

tū mile 'mehr' se iimā yahī tārīḳh ho sach

gulshan-o-bāda-o-gul meñ tujhe garmā.e havā

badan-e-yar ki bu-bas uDa lae hawa

jaan aae jo wahan ho ke yahan aae hawa

badan-e-yar ko bas chhu ke na itrae hawa

itr ki ban ke lipaT mujh se lipaT jae hawa

un ke kuche mein ghubar apna uDa kar le jae

mujh pe ehsan kare mere bhi kaam aae hawa

ho hawa-dar sawari ka mere dosh-e-saba

na-tawan wo hun ki us tak mujhe pahunchae hawa

bandh gai bagh mein teri to hawa baad-e-saba

un ke kuche mein meri aah ki bandh jae hawa

ek nigah baad-e-hawai bhi tumhaari hai sitam

jaan is tir-e-hawai se na ho jae hawa

kyun na ho baad-e-bahaari mujhe ye farmaish

kyun na bandhun main hawa yar jo bandhwae hawa

kitni nazuk wo pari hai ki hawa-dar us ka

surat-e-taKHt-e-sulaiman raha baala-e-hawa

tu mile 'mehr' se ima yahi tariKH ho sach

gulshan-o-baada-o-gul mein tujhe garmae hawa