badan ke chaak par zarf-e-numu tayyar karta hun

badan ke chaak par zarf-e-numū tayyār kartā huuñ

maiñ kūza-gar huuñ aur miTTī kā kārobār kartā huuñ

mirī ḳhandaq meñ us ke qurb kī qindīl raushan hai

mire dushman se kah denā maiñ us se pyaar kartā huuñ

kahīñ to reg-e-ḳhufta kī tarah paanī meñ paḌ rahtā

varaq-gardānī-e-sahrā maiñ kyuuñ be-kār kartā huuñ

uThā.e phir rahā huuñ hasrat-e-tāmīr kī īñTeñ

jahāñ saaya nahīñ hotā vahīñ dīvār kartā huuñ

jahāñ bhī shām-e-tan jaa.e muhāfiz saañp kī sūrat

maiñ apnī rezgārī kī vahīñ ambār kartā huuñ

usī ko sāmne pā kar usī ko bhīñch kar 'tābish'

sukūt-e-nā-shanāsī ko suḳhan-āsār kartā huuñ

badan ke chaak par zarf-e-numu tayyar karta hun

main kuza-gar hun aur miTTi ka karobar karta hun

meri KHandaq mein us ke qurb ki qindil raushan hai

mere dushman se kah dena main us se pyar karta hun

kahin to reg-e-KHufta ki tarah pani mein paD rahta

waraq-gardani-e-sahra main kyun be-kar karta hun

uThae phir raha hun hasrat-e-tamir ki inTen

jahan saya nahin hota wahin diwar karta hun

jahan bhi sham-e-tan jae muhafiz sanp ki surat

main apni rezgari ki wahin ambar karta hun

usi ko samne pa kar usi ko bhinch kar 'tabish'

sukut-e-na-shanasi ko suKHan-asar karta hun