badan ko wajd tere be-hisab-o-had aae

badan ko vajd tire be-hisāb-o-had aa.e

mirī rasā.ī meñ gar terā jazr-o-mad aa.e

maiñ ik daf.a tujhe chūmūñ to tere ḳhvāboñ meñ

kisī bhī mard kā chehrā na tā-abad aa.e

maiñ teġh-e-ishq se gar tol duuñ badan terā

tirī nazar meñ na mīzān-e-nek-o-bad aa.e

jo tere ḳhvāb meñ aa jaa.e barshgāl mirā

mire liye na tire lab pe radd-o-kad aa.e

har ek saal manā.ūñ maiñ jashn-e-lams us kā

jo dastaras meñ mirī vo darāz-qad aa.e

bahut sajegī ye poshāk-e-harf ai 'kāshif'

jo shā.erī meñ mirī us ke ḳhāl-o-ḳhad aa.e

badan ko wajd tere be-hisab-o-had aae

meri rasai mein gar tera jazr-o-mad aae

main ek dafa tujhe chumun to tere KHwabon mein

kisi bhi mard ka chehra na ta-abad aae

main tegh-e-ishq se gar tol dun badan tera

teri nazar mein na mizan-e-nek-o-bad aae

jo tere KHwab mein aa jae barshgal mera

mere liye na tere lab pe radd-o-kad aae

har ek sal manaun main jashn-e-lams us ka

jo dastaras mein meri wo daraaz-qad aae

bahut sajegi ye poshak-e-harf ai 'kashif'

jo shaeri mein meri us ke KHal-o-KHad aae