badan mein ruh ki tarsil karne wale log

badan meñ ruuh kī tarsīl karne vaale log

badal ga.e mujhe tabdīl karne vaale log

abad talak ke manāzir sameT lete haiñ

zarā sī aañkh ko zambīl karne vaale log

tumhī batāo tumheñ chhoḌ kar kidhar jaa.eñ

tumhārī baat kī ta.amīl karne vaale log

kise batā.eñ ki shāḳh-e-salīb kaun sī hai

ye paat paat ko injīl karne vaale log

zamīñ pe aa.e the kār-e-payambarī ke liye

zamīñ supurd-e-azāzīl karne vaale log

añdherī raat hai ḳheme meñ ik diyā bhī nahīñ

kahāñ haiñ sabr ko qindīl karne vaale log

ubuur kar ke ise ho ga.e kahāñ ābād

hayāt rahguzar-e-nīl karne vaale log

ham apne ishq se duniyā badalnā chāhte haiñ

magar ye ishq kī tazlīl karne vaale log

badan mein ruh ki tarsil karne wale log

badal gae mujhe tabdil karne wale log

abad talak ke manazir sameT lete hain

zara si aankh ko zambil karne wale log

tumhi batao tumhein chhoD kar kidhar jaen

tumhaari baat ki tamil karne wale log

kise bataen ki shaKH-e-salib kaun si hai

ye pat pat ko injil karne wale log

zamin pe aae the kar-e-payambari ke liye

zamin supurd-e-azazil karne wale log

andheri raat hai KHeme mein ek diya bhi nahin

kahan hain sabr ko qindil karne wale log

ubur kar ke ise ho gae kahan aabaad

hayat rahguzar-e-nil karne wale log

hum apne ishq se duniya badalna chahte hain

magar ye ishq ki tazlil karne wale log