baDe shabab pe dard-e-firaq-e-masti hai

baḌe shabāb pe dard-e-firāq-e-mastī hai

na ho sharāb to pahroñ ghaTā barastī hai

na sham.a rotī hai aa kar na barq hañstī hai

maiñ jab se qabr meñ huuñ bekasī barastī hai

sune to kaun sune mai-kade meñ vaa.iz kī

yahāñ vahī haiñ jinheñ shaġhl-e-mai-parastī hai

maiñ saḳht-jāñ nahīñ ḳhanjar bhī tez hai lekin

nigāh-e-yās hai qātil kī tez-dastī hai

bhare huoñ ko bharā karte haiñ karam vaale

jahāñ hai sabza ghaTā bhī vahīñ barastī hai

ġhalat hai zer-e-nagīñ ho ke da.ava-e-vus.at

bas ek halqa-e-ḳhātam fazā-e-hastī hai

hazār ḳhvāhish-e-dil hai magar na māñgūñgā

subū-e-mai-kada par vaqt-e-tañg-dastī hai

maiñ sun ke aayā thā ābādī-e-adam lekin

koī nazar nahīñ aatā ye kaisī bastī hai

chaman na dekh nasheman ko dekh ai bulbul

bahār hī meñ kabhī aag bhī barastī hai

jalā.ūñ sham.a to āḳhir jalā ke dekhūñ kyā

har ek raat yahāñ shaġhl-e-ġham-parastī hai

nahīñ hai dahr meñ yaar ai dam-zadan 'sāqib'

bas ek saañs meñ tai mājrā-e-hastī hai

baDe shabab pe dard-e-firaq-e-masti hai

na ho sharab to pahron ghaTa barasti hai

na shama roti hai aa kar na barq hansti hai

main jab se qabr mein hun bekasi barasti hai

sune to kaun sune mai-kade mein waiz ki

yahan wahi hain jinhen shaghl-e-mai-parasti hai

main saKHt-jaan nahin KHanjar bhi tez hai lekin

nigah-e-yas hai qatil ki tez-dasti hai

bhare huon ko bhara karte hain karam wale

jahan hai sabza ghaTa bhi wahin barasti hai

ghalat hai zer-e-nagin ho ke dawa-e-wusat

bas ek halqa-e-KHatam faza-e-hasti hai

hazar KHwahish-e-dil hai magar na mangunga

subu-e-mai-kada par waqt-e-tang-dasti hai

main sun ke aaya tha aabaadi-e-adam lekin

koi nazar nahin aata ye kaisi basti hai

chaman na dekh nasheman ko dekh ai bulbul

bahaar hi mein kabhi aag bhi barasti hai

jalaun shama to aaKHir jala ke dekhun kya

har ek raat yahan shaghl-e-gham-parasti hai

nahin hai dahr mein yar ai dam-zadan 'saqib'

bas ek sans mein tai majra-e-hasti hai