baDh rahe hain sham ke mauhum sae chal paDo

baḌh rahe haiñ shaam ke mauhūm saa.e chal paḌo

zindagī kī laash kāñdhoñ par uThā.e chal paḌo

ḳhair-maqdam kar rahī haiñ Thokareñ kis shaan se

paañv ke chhāle ye kah kar muskurā.e chal paḌo

oḌh lo sar par dukānoñ daftaroñ ke sā.ebāñ

jān-levā haiñ makānoñ ke kirā.e chal paḌo

phir qudūm-e-shauq ko chhūne lagī āvārgī

phir bulāve kūcha-e-jānāñ se aa.e chal paḌo

aaj TuuTī hai lab-e-ehsās se mohar-e-sukūt

aaj tanhā.ī ne talve gudgudā.e chal paḌo

muḌ ke mat dekho zamāne ko ki but ban jāoge

aañkh mīche haath bāñdhe sar jhukā.e chal paḌo

vaqt ke sahrā meñ nañge paañv Thahre ho 'salīm'

dhuup kī shiddat yakāyak baḌh na jaa.e chal paḌo

baDh rahe hain sham ke mauhum sae chal paDo

zindagi ki lash kandhon par uThae chal paDo

KHair-maqdam kar rahi hain Thokaren kis shan se

panw ke chhaale ye kah kar muskurae chal paDo

oDh lo sar par dukanon daftaron ke saeban

jaan-lewa hain makanon ke kirae chal paDo

phir qudum-e-shauq ko chhune lagi aawargi

phir bulawe kucha-e-jaanan se aae chal paDo

aaj TuTi hai lab-e-ehsas se mohar-e-sukut

aaj tanhai ne talwe gudgudae chal paDo

muD ke mat dekho zamane ko ki but ban jaoge

aankh miche hath bandhe sar jhukae chal paDo

waqt ke sahra mein nange panw Thahre ho 'salim'

dhup ki shiddat yakayak baDh na jae chal paDo