baDhaya hath magar kuchh sila na hath aaya

baḌhāyā haath magar kuchh sila na haath aayā

kaf-e-tahī ke safar meñ gayā na haath aayā

girah meñ kholtā kaise ḳhirad-asīroñ kī

ki Dor uljhī huī thī sirā na haath aayā

ye rasm ḳhuub chalī hai mire zamāne meñ

ki haath lag gayā achchhā burā na haath aayā

lo hāthoñ haath luTā hai bahār kā ḳhirman

ḳhizāñ to ḳhush huī jaise ḳhazāna haath aayā

maiñ us ke sāmne ḳhāmosh kyā rahā ki use

ḳhitāb karne kā sab se bahāna haath aayā

sarāb detā hameñ kyā havas ke sahrā meñ

sivā.e musht-e-ġhubār-e-havā na haath aayā

majāl hai ye kisī kī koī bashar ye kahe

ḳhudā ḳhudā bhī kiyā aur ḳhudā na haath aayā

baDhaya hath magar kuchh sila na hath aaya

kaf-e-tahi ke safar mein gaya na hath aaya

girah mein kholta kaise KHirad-asiron ki

ki Dor uljhi hui thi sira na hath aaya

ye rasm KHub chali hai mere zamane mein

ki hath lag gaya achchha bura na hath aaya

lo hathon hath luTa hai bahaar ka KHirman

KHizan to KHush hui jaise KHazana hath aaya

main us ke samne KHamosh kya raha ki use

KHitab karne ka sab se bahana hath aaya

sarab deta hamein kya hawas ke sahra mein

siwae musht-e-ghubar-e-hawa na hath aaya

majal hai ye kisi ki koi bashar ye kahe

KHuda KHuda bhi kiya aur KHuda na hath aaya