baDhte hain KHud-ba-KHud qadam azm-e-safar ko kya karun

baḌhte haiñ ḳhud-ba-ḳhud qadam azm-e-safar ko kyā karūñ

zer-e-qadam hai kahkashāñ zauq-e-nazar ko kyā karūñ

tez hai kārvān-e-vaqt tishna hai justujū abhī

rok luuñ zindagī kahāñ shām-o-sahar ko kyā karūñ

dair-o-haram ke rañg bhī dekh chukī nigāh-e-zīst

dil meñ to hai vahī chubhan āh-e-sahar ko kyā karūñ

aaj bhī hai vahī maqām aaj bhī lab pe un kā naam

manzil be-shumār gaam apne safar ko kyā karūñ

yaad kisī kī aa ga.ī ho ga.ī dhundlī kā.enāt

parde meñ chhup gayā koī dīda-e-tar ko kyā karūñ

kitnī umīdoñ ke charāġh raah meñ bujh ke rah ga.e

apne to paañv thak ga.e shauq-e-safar ko kyā karūñ

ho ga.ī zindagī kī shaam 'sālik'-e-rāh thak ga.e

manzileñ duur ho ga.iiñ rāh-e-guzar ko kyā karūñ

baDhte hain KHud-ba-KHud qadam azm-e-safar ko kya karun

zer-e-qadam hai kahkashan zauq-e-nazar ko kya karun

tez hai karwan-e-waqt tishna hai justuju abhi

rok lun zindagi kahan sham-o-sahar ko kya karun

dair-o-haram ke rang bhi dekh chuki nigah-e-zist

dil mein to hai wahi chubhan aah-e-sahar ko kya karun

aaj bhi hai wahi maqam aaj bhi lab pe un ka nam

manzil be-shumar gam apne safar ko kya karun

yaad kisi ki aa gai ho gai dhundli kaenat

parde mein chhup gaya koi dida-e-tar ko kya karun

kitni umidon ke charagh rah mein bujh ke rah gae

apne to panw thak gae shauq-e-safar ko kya karun

ho gai zindagi ki sham 'salik'-e-rah thak gae

manzilen dur ho gain rah-e-guzar ko kya karun