baDhti hui nafrat ko mohabbat se miTa de

baḌhtī huī nafrat ko mohabbat se miTā de

duniyā ko bhī jiine kā ye andāz sikhā de

jaate hue lamhoñ kā hai bas itnā taqāzā

bujhte hue sho.aloñ ko na phir koī havā de

kuchh aisī ḳhatā.eñ haiñ jo ho jaatī haiñ sab se

mālik pe ye chhoḌā hai vo jo chāhe sazā de

farzānoñ se pūchhā thā ki kis baat pe gum haiñ

kahne lage hañs ke koī dīvāna banā de

bebāk sī fitrat pe unheñ naaz bahut hai

tahzībī taqāze bhī haiñ kuchh un ko batā de

sochā thā ki un ko koī paiġhām na deñge

mausam kā taqāzā hai koī un ko bulā de

guzre hue lamhoñ ko agar Dar hai to itnā

'shamshād' unheñ zehn se apne na haTā de

baDhti hui nafrat ko mohabbat se miTa de

duniya ko bhi jine ka ye andaz sikha de

jate hue lamhon ka hai bas itna taqaza

bujhte hue shoalon ko na phir koi hawa de

kuchh aisi KHataen hain jo ho jati hain sab se

malik pe ye chhoDa hai wo jo chahe saza de

farzanon se puchha tha ki kis baat pe gum hain

kahne lage hans ke koi diwana bana de

bebak si fitrat pe unhen naz bahut hai

tahzibi taqaze bhi hain kuchh un ko bata de

socha tha ki un ko koi paigham na denge

mausam ka taqaza hai koi un ko bula de

guzre hue lamhon ko agar Dar hai to itna

'shamshad' unhen zehn se apne na haTa de