baDi farz-ashna hai saba kare KHub kaam hisab ka

baḌī farz-āshnā hai sabā kare ḳhuub kaam hisāb kā

phir uḌā ke le ga.ī ik varaq mirī zindagī kī kitāb kā

kahūñ kyā ki dasht-e-hayāt meñ rahā silsila vo sarāb kā

kabhī hausla hī na kar sakī mirī aañkh dariyā ke ḳhvāb kā

na atā-e-duḳhtar-e-raz hai ye na hai faiz-e-sāqī-e-mai-nafas

jo chaḌhe to phir na utar sake ye nasha hai fan kī sharāb kā

sar-e-rāh mil ke bichhaḌ ga.e thā bas ek pal kā vo hādsa

mire sehn-e-dil meñ muqīm hai vahī ek lamha azaab kā

mire saath saath safar meñ hai mire ghar kī saarī hamāhamī

sar-e-gosh qahqahe ras-bhare sar-e-dosh phuul gulāb kā

do farishta dast-e-balā liye do chhalakte jaam takā kiye

mire ham-rikāb vo mauj-e-gul vahī sail-e-chashm-e-pur-āb kā

maiñ agarche kar bhī chukā raqam idhar ek daftar-e-rañj-o-ġham

magar intizār hai dam-ba-dam mujhe pahle ḳhat ke javāb kā

ye jo mere sāġhar-e-dil meñ hai mai-e-fan hai ḳhuuñ kī kashīd hai

yahī ek umr kā mā-hasal yahī tosha ḳhāna-ḳharāb kā

zarā soch anjum-e-nā-tavāñ ye vafā kā zikr kahāñ kahāñ

sar-e-bazm kar na ise bayāñ ye sabaq hai sirf nisāb kā

baDi farz-ashna hai saba kare KHub kaam hisab ka

phir uDa ke le gai ek waraq meri zindagi ki kitab ka

kahun kya ki dasht-e-hayat mein raha silsila wo sarab ka

kabhi hausla hi na kar saki meri aankh dariya ke KHwab ka

na ata-e-duKHtar-e-raz hai ye na hai faiz-e-saqi-e-mai-nafas

jo chaDhe to phir na utar sake ye nasha hai fan ki sharab ka

sar-e-rah mil ke bichhaD gae tha bas ek pal ka wo hadsa

mere sehn-e-dil mein muqim hai wahi ek lamha azab ka

mere sath sath safar mein hai mere ghar ki sari hamahami

sar-e-gosh qahqahe ras-bhare sar-e-dosh phul gulab ka

do farishta dast-e-bala liye do chhalakte jam taka kiye

mere ham-rikab wo mauj-e-gul wahi sail-e-chashm-e-pur-ab ka

main agarche kar bhi chuka raqam idhar ek daftar-e-ranj-o-gham

magar intizar hai dam-ba-dam mujhe pahle KHat ke jawab ka

ye jo mere saghar-e-dil mein hai mai-e-fan hai KHun ki kashid hai

yahi ek umr ka ma-hasal yahi tosha KHana-KHarab ka

zara soch anjum-e-na-tawan ye wafa ka zikr kahan kahan

sar-e-bazm kar na ise bayan ye sabaq hai sirf nisab ka