badla ye liya hasrat-e-izhaar se humne

badla ye liyā hasrat-e-iz.hār se ham ne

āġhāz kiyā apne hī inkār se ham ne

darvāza nahīñ apne sarokār meñ shāmil

hai rābta rakkhā huā dīvār se ham ne

imkān sā kholā huā sāhil kī havā par

ummīd sī bāñdhī huī us paar se ham ne

apnī hī bigāḌī huī sūrat ke alāva

kuchh aur nikālā nahīñ tūmār se ham ne

is kā bhī koī fā.eda pahuñchā na kisī ko

āsāñ jo barāmad kiyā dushvār se ham ne

manzil jo hamārī thī kahīñ rah ga.ī pīchhe

ye kaam liyā tundi-e-raftār se ham ne

ye dhuup hī thī apnī guzargāh so rakkhā

ik fāsla bhī sāya-e-ashjār se ham ne

jāñchā hai kisī aur tarīqe se ye sab kuchh

parkhā hai kisī apne hī me.aar se ham ne

us kī bhī adā kī hai 'zafar' aaj to qīmat

jo chiiz ḳharīdī nahīñ bāzār se ham ne

badla ye liya hasrat-e-izhaar se hum ne

aaghaz kiya apne hi inkar se hum ne

darwaza nahin apne sarokar mein shamil

hai rabta rakkha hua diwar se hum ne

imkan sa khola hua sahil ki hawa par

ummid si bandhi hui us par se hum ne

apni hi bigaDi hui surat ke alawa

kuchh aur nikala nahin tumar se hum ne

is ka bhi koi faeda pahuncha na kisi ko

aasan jo baramad kiya dushwar se hum ne

manzil jo hamari thi kahin rah gai pichhe

ye kaam liya tundi-e-raftar se hum ne

ye dhup hi thi apni guzargah so rakkha

ek fasla bhi saya-e-ashjar se hum ne

jaancha hai kisi aur tariqe se ye sab kuchh

parkha hai kisi apne hi mear se hum ne

us ki bhi ada ki hai 'zafar' aaj to qimat

jo chiz KHaridi nahin bazar se hum ne