badle na gae humse to haalat abhi tak

badle na ga.e ham se to hālāt abhī tak

karte hī rahe log savālāt abhī tak

ik ham ki kahīñ āshiyāñ ta.amīr na kar paa.e

vo mahv ba-ta.amīr-e-mahallāt abhī tak

ik baar hī duniyā se zarā dil jo lagāyā

dāman se haiñ lipTī huī āfāt abhī tak

kartī rahīñ insān ko insān se bad-zan

tahzīb-e-nau ye terī ḳhurāfāt abhī tak

miltā hī nahīñ koī hameñ pūchhne vaalā

siine meñ dabā rakkhe haiñ jazbāt abhī tak

dil TuuT sā jaatā hai taḌap jaatā huuñ us dam

yaad aate haiñ rah rah ke vo lamhāt abhī tak

ik ham hī 'amīñ' vaqt kā paiġhām na samjhe

mumkin hai badal jaate ye hālāt abhī tak

badle na gae hum se to haalat abhi tak

karte hi rahe log sawalat abhi tak

ek hum ki kahin aashiyan tamir na kar pae

wo mahw ba-tamir-e-mahallat abhi tak

ek bar hi duniya se zara dil jo lagaya

daman se hain lipTi hui aafat abhi tak

karti rahin insan ko insan se bad-zan

tahzib-e-nau ye teri KHurafat abhi tak

milta hi nahin koi hamein puchhne wala

sine mein daba rakkhe hain jazbaat abhi tak

dil TuT sa jata hai taDap jata hun us dam

yaad aate hain rah rah ke wo lamhat abhi tak

ek hum hi 'amin' waqt ka paigham na samjhe

mumkin hai badal jate ye haalat abhi tak