badli hui duniya ki nazar dekh rahe hain

badlī huī duniyā kī nazar dekh rahe haiñ

phaltā huā nafrat kā shajar dekh rahe haiñ

bastī ke sulagte hue ghar dekh rahe haiñ

dil-doz manāzir haiñ magar dekh rahe haiñ

vo kar bhī chuke ġhair se iqrār-e-mohabbat

ham baiThe duāoñ meñ asar dekh rahe haiñ

hotī hai har ik phuul se gulzār kī zīnat

nādān haiñ jo nasl-e-shajar dekh rahe haiñ

ik roz na jal jaa.e kahīñ un kā nasheman

jo duur khaḌe raqs-e-sharar dekh rahe haiñ

manzil kī jinheñ dhun thī unheñ mil ga.ī manzil

jo baiTh rahe gard-e-safar dekh rahe haiñ

'afshāñ' mirī āñkhoñ meñ basī rahtī hai har-dam

vo shakl jise ahl-e-nazar dekh rahe haiñ

badli hui duniya ki nazar dekh rahe hain

phalta hua nafrat ka shajar dekh rahe hain

basti ke sulagte hue ghar dekh rahe hain

dil-doz manazir hain magar dekh rahe hain

wo kar bhi chuke ghair se iqrar-e-mohabbat

hum baiThe duaon mein asar dekh rahe hain

hoti hai har ek phul se gulzar ki zinat

nadan hain jo nasl-e-shajar dekh rahe hain

ek roz na jal jae kahin un ka nasheman

jo dur khaDe raqs-e-sharar dekh rahe hain

manzil ki jinhen dhun thi unhen mil gai manzil

jo baiTh rahe gard-e-safar dekh rahe hain

'afshan' meri aankhon mein basi rahti hai har-dam

wo shakl jise ahl-e-nazar dekh rahe hain