badli hui hai charKH ki raftar aaj-kal

badlī huī hai charḳh kī raftār āj-kal

ho band rāst-goī kā bāzār āj-kal

ilm-o-hunar hai mulk ko darkār āj-kal

ham ḳhud bhale-bure ke haiñ muḳhtār āj-kal

hai aur hī tarīqa-e-bāzār āj-kal

jins-e-nafīs ke haiñ ḳharīdār āj-kal

ġhaflat kā daur mulk se shāyad guzar gayā

maḳhlūq hotī jaatī hai bedār āj-kal

gul-gūna-e-taraqqī-e-tahzīb-o-'ilm se

shukr-e-ḳhudā ki surḳh haiñ ruḳhsār āj-kal

kyuuñ jānte haiñ san.at-o-hirfat ko bāġh-e-ḳhuld

ġhairoñ kī ham nigāh meñ haiñ ḳhaar āj-kal

raushan hai apnī be-hunarī āftāb se

hai sub.h ke qarīb shab-e-tār āj-kal

bigḌī huī hai mai-kada-e-dahr kī havā

ho jaa.eñ shaiḳh-jī bhī na mai-ḳhvār āj-kal

kyā kaam in safed chuḌailoñ kā hind meñ

kyuuñ aisī shādiyoñ kī hai bhar-mār āj-kal

har chiiz kī girānī ne vīrān kar diyā

sarf-e-ḳhizāñ hai hind kā gulzār āj-kal

is baaġh meñ hai bād-e-ḳhizāñ o bād-e-qaht

har gul ke dil meñ hai ḳhalish-e-ḳhār āj-kal

bhūle haiñ apne farz ko ye ḳhvājgān-e-hind

haq dene meñ bhī karte haiñ inkār āj-kal

shukr-e-ḳhudā ki zulm se ma.azūr hai falak

bartāniya hai ḳhalq kī ġham-ḳhvār āj-kal

yārab hamāre dil ko tū apnī panāh de

dildār ho ga.e haiñ dil-āzār āj-kal

maḳhsūs ho chukī haiñ irādī ġhulāmiyāñ

hai ik anaar saikḌoñ bīmār āj-kal

ek ek kar ke jitne hunar the vo chhin ga.e

ham zindagī se kyuuñ na hoñ bezār āj-kal

ik jurm aur fard-e-jarā.em meñ baḌh gayā

yā'nī na dard-e-dil kā ho iz.hār āj-kal

jiine kī fikr kījiye aur peT kā ḳhayāl

mauqūf kiije 'ishq kā āzār āj-kal

pābandiyāñ bhī chāhiyeñ insān ko zarūr

āzādiyoñ kī kyuuñ hai ye bhar-mār āj-kal

miltā nahīñ kahīñ dahan-e-yār hai anaaj

fāqoñ se jism hai kamar-e-yār āj-kal

hai tañg-dastiyoñ ke sabab zo'f is qadar

sab kī haiñ āñkheñ nargis-e-bīmār āj-kal

lākhoñ muhāl aqlī o 'aadī sahī magar

kasb-e-ma.āsh sab se hai dushvār āj-kal

kyā kiije tar nivāloñ kā mausam nahīñ rahā

chipke hue haiñ yaar ke ruḳhsār āj-kal

fāqoñ se hai ye haal agar tol kar biThā.eñ

aadhe ticket meñ jaa.e tan-e-zār āj-kal

gul kar diyā charāġh-e-ma.īshat tū ai havā

me.ada ke bhī na ghis ga.e kyuuñ ḳhaar āj-kal

chāroñ taraf buland hai fariyād haa.e haa.e

mātam-kada hai qahqah-e-dīvār āj-kal

daulat jab aa.egī ki vahī chiiz ham banā.eñ

jo chiiz chāhte hoñ ḳharīdār āj-kal

behtar hai kār-ḳhānoñ se ho mulk kā bhalā

ugaleñ gaḌe ḳhazānoñ ko zardār āj-kal

san.at kā naam ganj hai hirfat kā naam zar

ilm-e-shikam hai mulk ko darkār āj-kal

'parvīñ' kī ye du'ā hai rahe amn mulk meñ

rabb-e-ġhafūr tū hī hai ġham-ḳhvār āj-kal

badli hui hai charKH ki raftar aaj-kal

ho band rast-goi ka bazar aaj-kal

ilm-o-hunar hai mulk ko darkar aaj-kal

hum KHud bhale-bure ke hain muKHtar aaj-kal

hai aur hi tariqa-e-bazar aaj-kal

jins-e-nafis ke hain KHaridar aaj-kal

ghaflat ka daur mulk se shayad guzar gaya

maKHluq hoti jati hai bedar aaj-kal

gul-guna-e-taraqqi-e-tahzib-o-'ilm se

shukr-e-KHuda ki surKH hain ruKHsar aaj-kal

kyun jaante hain sanat-o-hirfat ko bagh-e-KHuld

ghairon ki hum nigah mein hain KHar aaj-kal

raushan hai apni be-hunari aaftab se

hai subh ke qarib shab-e-tar aaj-kal

bigDi hui hai mai-kada-e-dahr ki hawa

ho jaen shaiKH-ji bhi na mai-KHwar aaj-kal

kya kaam in safed chuDailon ka hind mein

kyun aisi shadiyon ki hai bhar-mar aaj-kal

har chiz ki girani ne viran kar diya

sarf-e-KHizan hai hind ka gulzar aaj-kal

is bagh mein hai baad-e-KHizan o baad-e-qaht

har gul ke dil mein hai KHalish-e-KHar aaj-kal

bhule hain apne farz ko ye KHwajgan-e-hind

haq dene mein bhi karte hain inkar aaj-kal

shukr-e-KHuda ki zulm se mazur hai falak

bartaniya hai KHalq ki gham-KHwar aaj-kal

yarab hamare dil ko tu apni panah de

dildar ho gae hain dil-azar aaj-kal

maKHsus ho chuki hain iradi ghulamiyan

hai ek anar saikDon bimar aaj-kal

ek ek kar ke jitne hunar the wo chhin gae

hum zindagi se kyun na hon bezar aaj-kal

ek jurm aur fard-e-jaraem mein baDh gaya

ya'ni na dard-e-dil ka ho izhaar aaj-kal

jine ki fikr kijiye aur peT ka KHayal

mauquf kije 'ishq ka aazar aaj-kal

pabandiyan bhi chahiyen insan ko zarur

aazadiyon ki kyun hai ye bhar-mar aaj-kal

milta nahin kahin dahan-e-yar hai anaj

faqon se jism hai kamar-e-yar aaj-kal

hai tang-dastiyon ke sabab zo'f is qadar

sab ki hain aankhen nargis-e-bimar aaj-kal

lakhon muhaal aqli o 'adi sahi magar

kasb-e-maash sab se hai dushwar aaj-kal

kya kije tar niwalon ka mausam nahin raha

chipke hue hain yar ke ruKHsar aaj-kal

faqon se hai ye haal agar tol kar biThaen

aadhe ticket mein jae tan-e-zar aaj-kal

gul kar diya charagh-e-maishat tu ai hawa

meada ke bhi na ghis gae kyun KHar aaj-kal

chaaron taraf buland hai fariyaad hae hae

matam-kada hai qahqah-e-diwar aaj-kal

daulat jab aaegi ki wahi chiz hum banaen

jo chiz chahte hon KHaridar aaj-kal

behtar hai kar-KHanon se ho mulk ka bhala

ugalen gaDe KHazanon ko zardar aaj-kal

sanat ka nam ganj hai hirfat ka nam zar

ilm-e-shikam hai mulk ko darkar aaj-kal

'parwin' ki ye du'a hai rahe amn mulk mein

rabb-e-ghafur tu hi hai gham-KHwar aaj-kal