baghair apne kisi matlab ke ulfat kaun karta hai

baġhair apne kisī matlab ke ulfat kaun kartā hai

ye duniyā hai yahāñ be-laus chāhat kaun kartā hai

gavārā lutf-farmānī kī zahmat kaun kartā hai

mohabbat karne vaale se mohabbat kaun kartā hai

kabhī ā.īna le kar husn se apnī zarā pūchho

nazar ko dil ko pāband-e-mohabbat kaun kartā hai

mohabbat maiñ bhī kartā huuñ mohabbat tum bhī kartī ho

magar donoñ meñ muñh-dekhī mohabbat kaun kartā hai

sharīk-e-zindagī ho kar mirā tum saath kyā dogī

kisī ke rañj par qurbān rāhat kaun kartā hai

tumheñ zo.am-e-mohabbat hai mujhe bhī hai magar ai jaañ

tum apnī dil se hī pūchho mohabbat kaun kartā hai

javānī ke nikharte husn kī andāz se pūchho

mire ḳhvābīda jazboñ se sharārat kaun kartā hai

ġhalat ilzām hai mujh par mire barbād hone kā

ḳhud apne vāste paidā musībat kaun kartā hai

TaTolo apne dil ko aur apne dil se hī pūchho

ki ye mere liye sāmān-e-vahshat kaun kartā hai

ġharaz-mandī tak ai 'afzal' mohabbat sab ko hotī hai

mohabbat āj-kal hasb-e-mohabbat kaun kartā hai

baghair apne kisi matlab ke ulfat kaun karta hai

ye duniya hai yahan be-laus chahat kaun karta hai

gawara lutf-farmani ki zahmat kaun karta hai

mohabbat karne wale se mohabbat kaun karta hai

kabhi aaina le kar husn se apni zara puchho

nazar ko dil ko paband-e-mohabbat kaun karta hai

mohabbat main bhi karta hun mohabbat tum bhi karti ho

magar donon mein munh-dekhi mohabbat kaun karta hai

sharik-e-zindagi ho kar mera tum sath kya dogi

kisi ke ranj par qurban rahat kaun karta hai

tumhein zoam-e-mohabbat hai mujhe bhi hai magar ai jaan

tum apni dil se hi puchho mohabbat kaun karta hai

jawani ke nikharte husn ki andaz se puchho

mere KHwabida jazbon se shararat kaun karta hai

ghalat ilzam hai mujh par mere barbaad hone ka

KHud apne waste paida musibat kaun karta hai

TaTolo apne dil ko aur apne dil se hi puchho

ki ye mere liye saman-e-wahshat kaun karta hai

gharaz-mandi tak ai 'afzal' mohabbat sab ko hoti hai

mohabbat aaj-kal hasb-e-mohabbat kaun karta hai