baghair tere hon mah-o-anjum ki shisha-o-jam bujh gae hain

baġhair tere hoñ māh-o-anjum ki shīsha-o-jām bujh ga.e haiñ

jale the kitne charāġh lekin sabhī sar-e-shām bujh ga.e haiñ

vahī hai qānūn-e-jurm-e-ulfat diloñ pe qaideñ laboñ pe pahre

diloñ ke naġhmāt ruk ga.e haiñ laboñ ke paiġhām bujh ga.e haiñ

na us ke ruḳhsār kī shafaq hai na aarzū kī koī kiran hai

sahar ye kaisī sahar hai yaaro ki sab dar-o-bām bujh ga.e haiñ

huā hai vīrān shahr-e-dil yuuñ ki jaise vīrāñ huā ho mandir

koī sanam-ḳhāna luT gayā hai ki rū-e-asnām bujh ga.e haiñ

haiñ dasht-e-ġhurbat meñ pā-barahna na jaane kitne hī 'mīr'-o-'ġhālib'

udaas mai-ḳhānoñ kī fazāoñ meñ kitne ḳhayyām bujh ga.e haiñ

'payām' maqtūl ārzūoñ kā ik janāza hai zindagī bhī

thī jis se har anjuman charāġhāñ vo dil tah-e-dām bujh ga.e haiñ

baghair tere hon mah-o-anjum ki shisha-o-jam bujh gae hain

jale the kitne charagh lekin sabhi sar-e-sham bujh gae hain

wahi hai qanun-e-jurm-e-ulfat dilon pe qaiden labon pe pahre

dilon ke naghmat ruk gae hain labon ke paigham bujh gae hain

na us ke ruKHsar ki shafaq hai na aarzu ki koi kiran hai

sahar ye kaisi sahar hai yaro ki sab dar-o-baam bujh gae hain

hua hai viran shahr-e-dil yun ki jaise viran hua ho mandir

koi sanam-KHana luT gaya hai ki ru-e-asnam bujh gae hain

hain dasht-e-ghurbat mein pa-barahna na jaane kitne hi 'mir'-o-'ghaalib'

udas mai-KHanon ki fazaon mein kitne KHayyam bujh gae hain

'payam' maqtul aarzuon ka ek janaza hai zindagi bhi

thi jis se har anjuman charaghan wo dil tah-e-dam bujh gae hain