bahaar aa kar jo gulshan mein wo gaen

bahār aa kar jo gulshan meñ vo gaa.eñ

to ġhuncha har taraf chuTkī bajā.eñ

ye tum ko dekh kar gul phuul jaa.eñ

ki jaame meñ na phir phūle samā.eñ

mile rasta to sū-e-charḳh jaa.eñ

kahāñ tak is zamīñ par ḳhaak uḌā.eñ

misāl-e-sham.a us par lau lagā.eñ

sahar tak shaam se aañsū bahā.eñ

mire marne se ye andher kā sog

kaho missī maleñ surma lagā.eñ

chaman meñ us se ham-chashmī ye diida

tirī āñkheñ na nargis phuuT jaa.eñ

ḳhudā ke paas kyā jā.eñge zāhid

gunah-gāroñ se jab ye baar paa.eñ

taraddud phuul kā kis vāste hai

mirī turbat pe vo tevrī chaḌhā.eñ

mire lāshe ko kāñdhā de ke bole

chalo turbat meñ ab tum ko sulā.eñ

'saḳhī' rote hī rote dam nikal jaa.e

farāġhat ho kahīñ gañgā nahā.eñ

bahaar aa kar jo gulshan mein wo gaen

to ghuncha har taraf chuTki bajaen

ye tum ko dekh kar gul phul jaen

ki jame mein na phir phule samaen

mile rasta to su-e-charKH jaen

kahan tak is zamin par KHak uDaen

misal-e-shama us par lau lagaen

sahar tak sham se aansu bahaen

mere marne se ye andher ka sog

kaho missi malen surma lagaen

chaman mein us se ham-chashmi ye dida

teri aankhen na nargis phuT jaen

KHuda ke pas kya jaenge zahid

gunah-garon se jab ye bar paen

taraddud phul ka kis waste hai

meri turbat pe wo tewri chaDhaen

mere lashe ko kandha de ke bole

chalo turbat mein ab tum ko sulaen

'saKHi' rote hi rote dam nikal jae

faraghat ho kahin ganga nahaen