bahaar aaegi gulshan mein to dar-o-gir bhi hogi

bahār aa.egī gulshan meñ to dār-o-gīr bhī hogī

jahāñ ahl-e-junūñ hoñge vahāñ zanjīr bhī hogī

isī ummīd par ham gāmzan haiñ rāh-e-manzil meñ

yahāñ zulmat sahī aage kahīñ tanvīr bhī hogī

agar rahnā hai gulshan meñ to apne āshiyāne kī

kabhī taḳhrīb bhī hogī kabhī ta.amīr bhī hogī

yahī to soch kar ham un kī mahfil se chale aa.e

hamārī ḳhāmushī kī kuchh na kuchh tafsīr bhī hogī

ye ham bhī jānte haiñ zindagī ik ḳhvāb hai 'afsar'

magar is ḳhvāb kī āḳhir koī ta.abīr bhī hogī

bahaar aaegi gulshan mein to dar-o-gir bhi hogi

jahan ahl-e-junun honge wahan zanjir bhi hogi

isi ummid par hum gamzan hain rah-e-manzil mein

yahan zulmat sahi aage kahin tanwir bhi hogi

agar rahna hai gulshan mein to apne aashiyane ki

kabhi taKHrib bhi hogi kabhi tamir bhi hogi

yahi to soch kar hum un ki mahfil se chale aae

hamari KHamushi ki kuchh na kuchh tafsir bhi hogi

ye hum bhi jaante hain zindagi ek KHwab hai 'afsar'

magar is KHwab ki aaKHir koi tabir bhi hogi