bahaar-e-fikr ke jalwe luTa diye humne

bahār-e-fikr ke jalve luTā diye ham ne

junūn-e-ishq ke dariyā bahā diye ham ne

faroġh-e-dānish-o-burhāñ ke sho.ale bhaḌkā kar

tavahhumāt ke ḳhirman jalā diye ham ne

girā ke dark-o-basīrat kī bijliyāñ paiham

ta.assubāt ke TukḌe uḌā liye ham ne

banā ke fikr-o-tadabbur ko ḳhādim-e-insāñ

muqaddarāt ke chhakke chhuḌā diye ham ne

shu.ūr-e-naqd kī sehat-pasandiyoñ kī qasam

aqīdatoñ ke parḳhache uḌā diye ham ne

miTā ke tafarqa-e-ḳhās-o-ām kī la.anat

huqūq-e-ḳhās Thikāne lagā diye ham ne

fatādgān-e-zamīñ kā buland kar ke alam

falak-nashīnoñ ke parcham jhukā diye ham ne

na.e shu.ūr se zehnoñ meñ bijliyāñ bhar diiñ

na.ī umañgoñ se dil jagmagā diye ham ne

gumāñ hayāt pe hotā hai giit kī lai kā

kuchh aise giit jahāñ ko sunā diye ham ne

tilism toḌ ke jhūTī haqīqatoñ ke tamām

ajā.ibāt ke jaadū jagā diye ham ne

varā-e-charḳh the ābād jis qadar firdaus

zamīñ kī sat.h pe lā kar basā diye ham ne

banā ke mehnat-e-insāñ ko ek qadr-e-buland

zamīñ pe chāñd sitāre bichhā diye ham ne

jalā ke azmat-e-ādam kī sham-e-derīna

charāġh dair-o-haram ke bujhā diye ham ne

jo dark rakhte haiñ aḳhtar vo samjheñ aur batā.eñ

ye kis sharāb ke sāġhar luñDhā diye ham ne

bahaar-e-fikr ke jalwe luTa diye hum ne

junun-e-ishq ke dariya baha diye hum ne

farogh-e-danish-o-burhan ke shoale bhaDka kar

tawahhumat ke KHirman jala diye hum ne

gira ke dark-o-basirat ki bijliyan paiham

tassubaat ke TukDe uDa liye hum ne

bana ke fikr-o-tadabbur ko KHadim-e-insan

muqaddaraat ke chhakke chhuDa diye hum ne

shuur-e-naqd ki sehat-pasandiyon ki qasam

aqidaton ke parKHache uDa diye hum ne

miTa ke tafarqa-e-KHas-o-am ki lanat

huquq-e-KHas Thikane laga diye hum ne

fatadgan-e-zamin ka buland kar ke alam

falak-nashinon ke parcham jhuka diye hum ne

nae shuur se zehnon mein bijliyan bhar din

nai umangon se dil jagmaga diye hum ne

guman hayat pe hota hai git ki lai ka

kuchh aise git jahan ko suna diye hum ne

tilism toD ke jhuTi haqiqaton ke tamam

ajaibaat ke jadu jaga diye hum ne

wara-e-charKH the aabaad jis qadar firdaus

zamin ki sath pe la kar basa diye hum ne

bana ke mehnat-e-insan ko ek qadr-e-buland

zamin pe chand sitare bichha diye hum ne

jala ke azmat-e-adam ki sham-e-derina

charagh dair-o-haram ke bujha diye hum ne

jo dark rakhte hain aKHtar wo samjhen aur bataen

ye kis sharab ke saghar lunDha diye hum ne