bahaar-e-subh ajab rang-o-bu mein guzri hai

bahār-e-sub.h ajab rang-o-bū meñ guzrī hai

kalī kalī ye lage hai lahū meñ guzrī hai

mire shu.ūr ke tāroñ ko chheḌne vaale

tamām umr tirī justujū meñ guzrī hai

tire sivā na mujhe yaad aa sakā koī

tamām umr mirī tū hī tū maiñ guzrī hai

vo bad-nasīb jise koī āstāñ na milā

hayāt us kī ġham-e-kū-ba-kū meñ guzrī hai

mushāhida hai mirā ye ki bāġh-e-ālam meñ

har ik daraḳht kī shauq-e-numū meñ guzrī hai

kisī bhī gul se tire jism kī mahak mil jaa.e

chaman se sub.h isī aarzū meñ guzrī hai

mazā milā hai ye khetī kī aarzū kar ke

kaTī hai tez do-pahrī meñ lū meñ guzrī hai

ajiib hai ye zamāne kā gulsitāñ jis meñ

har ek phuul kī apnī hī bū meñ guzrī hai

kisī kī teġh-e-nazar se jo pyaar thā 'manzil'

tamām umr nahāte lahū meñ guzrī hai

bahaar-e-subh ajab rang-o-bu mein guzri hai

kali kali ye lage hai lahu mein guzri hai

mere shuur ke taron ko chheDne wale

tamam umr teri justuju mein guzri hai

tere siwa na mujhe yaad aa saka koi

tamam umr meri tu hi tu main guzri hai

wo bad-nasib jise koi aastan na mila

hayat us ki gham-e-ku-ba-ku mein guzri hai

mushahida hai mera ye ki bagh-e-alam mein

har ek daraKHt ki shauq-e-numu mein guzri hai

kisi bhi gul se tere jism ki mahak mil jae

chaman se subh isi aarzu mein guzri hai

maza mila hai ye kheti ki aarzu kar ke

kaTi hai tez do-pahri mein lu mein guzri hai

ajib hai ye zamane ka gulsitan jis mein

har ek phul ki apni hi bu mein guzri hai

kisi ki tegh-e-nazar se jo pyar tha 'manzil'

tamam umr nahate lahu mein guzri hai