bahaar kaun si tujh mein jamal-e-yar na thi

bahār kaun sī tujh meñ jamāl-e-yār na thī

mushāhida thā tirā sair-e-lāla-zār na thī

mahaktī zulfoñ se ḳhoshe guloñ ke chhūT gire

kuchh aur jaise ki gunjā.ish-e-bahār na thī

ham apne dil hī ko rote the lekin is ke liye

jahāñ meñ kaun sī shai thī jo be-qarār na thī

talāsh ek bahāna thā ḳhaak uḌāne kā

pata chalā ki hameñ justujū-e-yār na thī

jhukā hai qadmoñ meñ tere vo sar ki jis ke liye

koī jagah bhī munāsib sivā.e daar na thī

na jaane 'zeb' dil-e-zār kyuuñ taḌap uTThā

havā-e-sub.h thī ḳhushbū-e-zulf-e-yār na thī

bahaar kaun si tujh mein jamal-e-yar na thi

mushahida tha tera sair-e-lala-zar na thi

mahakti zulfon se KHoshe gulon ke chhuT gire

kuchh aur jaise ki gunjaish-e-bahaar na thi

hum apne dil hi ko rote the lekin is ke liye

jahan mein kaun si shai thi jo be-qarar na thi

talash ek bahana tha KHak uDane ka

pata chala ki hamein justuju-e-yar na thi

jhuka hai qadmon mein tere wo sar ki jis ke liye

koi jagah bhi munasib siwae dar na thi

na jaane 'zeb' dil-e-zar kyun taDap uTTha

hawa-e-subh thi KHushbu-e-zulf-e-yar na thi