bahr-e-gham mein dil ka qarina

bahr-e-ġham meñ dil kā qarīna

lākhoñ maujeñ ek safīna

TuuTā hai dil shaq hai siina

dekh kar us zālim kā qarīna

bhiig ga.ī duniyā-e-mohabbat

aayā thā kuchh mujh ko pasīna

shāḳheñ phūTīñ kaliyāñ chaTkīñ

aa pahuñchā phāgun kā mahīna

haal bhī merā aap na pūchheñ

itnī ranjish itnā kiina

mar jaanā takmīl-e-vafā meñ

hai me'rāj kā pahlā ziina

merī gardan terā ḳhanjar

terī barchhī merā siina

barq balā yā barq adā ho

donoñ kā hai ek qarīna

kyā ho sukūñ ai bahr-e-mohabbat

sāhil se hai duur safīna

jaltā huuñ terī mahfil meñ

jannat meñ dozaḳh kā qarīna

hijr kā 'ālam yaad hai mujh ko

ik ik din ek ek mahīna

maut kī saḳhtī maiñ ne samjhī

māthe par niklā jo pasīna

sham' ke dam se bazm munavvar

kahne ko mehmān-e-shabīna

koī jābir koī sābir

ik merā ik un kā qarīna

hil jaao bhī khul khelo bhī

achchhā din achchhā hai mahīna

unheñ mere dil se umañgeñ

ġharq kiyā maujoñ ne safīna

dil ko fuġhāñ pahuñchā.e falak tak

nīchī chhat hai ūñchā ziina

phir uTThā tūfān-e-mohabbat

'nūh' kareñ tayyār safīna

bahr-e-gham mein dil ka qarina

lakhon maujen ek safina

TuTa hai dil shaq hai sina

dekh kar us zalim ka qarina

bhig gai duniya-e-mohabbat

aaya tha kuchh mujh ko pasina

shaKHen phuTin kaliyan chaTkin

aa pahuncha phagun ka mahina

haal bhi mera aap na puchhen

itni ranjish itna kina

mar jaana takmil-e-wafa mein

hai me'raj ka pahla zina

meri gardan tera KHanjar

teri barchhi mera sina

barq bala ya barq ada ho

donon ka hai ek qarina

kya ho sukun ai bahr-e-mohabbat

sahil se hai dur safina

jalta hun teri mahfil mein

jannat mein dozaKH ka qarina

hijr ka 'alam yaad hai mujh ko

ek ek din ek ek mahina

maut ki saKHti main ne samjhi

mathe par nikla jo pasina

sham' ke dam se bazm munawwar

kahne ko mehman-e-shabina

koi jabir koi sabir

ek mera ek un ka qarina

hil jao bhi khul khelo bhi

achchha din achchha hai mahina

unhen mere dil se umangen

gharq kiya maujon ne safina

dil ko fughan pahunchae falak tak

nichi chhat hai uncha zina

phir uTTha tufan-e-mohabbat

'nuh' karen tayyar safina