bahti hui aankhon ki rawani mein mare hain

bahtī huī āñkhoñ kī ravānī meñ mare haiñ

kuchh ḳhvāb mire ain-javānī meñ mare haiñ

rotā huuñ maiñ un lafzoñ kī qabroñ pe ka.ī baar

jo lafz mirī shola-bayānī meñ mare haiñ

kuchh tujh se ye duurī bhī mujhe maar ga.ī hai

kuchh jazbe mire naql-e-makānī meñ mare haiñ

qabroñ meñ nahīñ ham ko kitāboñ meñ utāro

ham log mohabbat kī kahānī meñ mare haiñ

is ishq ne āḳhir hameñ barbād kiyā hai

ham log isī khaulte paanī meñ mare haiñ

kuchh had se ziyāda thā hameñ shauq-e-mohabbat

aur ham hī mohabbat kī girānī meñ mare haiñ

bahti hui aankhon ki rawani mein mare hain

kuchh KHwab mere ain-jawani mein mare hain

rota hun main un lafzon ki qabron pe kai bar

jo lafz meri shola-bayani mein mare hain

kuchh tujh se ye duri bhi mujhe mar gai hai

kuchh jazbe mere naql-e-makani mein mare hain

qabron mein nahin hum ko kitabon mein utaro

hum log mohabbat ki kahani mein mare hain

is ishq ne aaKHir hamein barbaad kiya hai

hum log isi khaulte pani mein mare hain

kuchh had se ziyaada tha hamein shauq-e-mohabbat

aur hum hi mohabbat ki girani mein mare hain