bahut chup hun ki hun chaunka hua main

bahut chup huuñ ki huuñ chauñkā huā maiñ

zamīñ par aa girā uḌtā huā maiñ

badan se jaan to jā hī chukī thī

kisī ne chhū liyā zinda huā maiñ

na jaane lafz kis duniyā meñ kho.e

tumhāre sāmne gūñgā huā maiñ

bhañvar meñ chhoḌ aa.e the mujhe tum

kināre aa lagā bahtā huā maiñ

ba-zāhir dikh rahā huuñ tanhā tanhā

kisī ke saath huuñ bichhḌā huā maiñ

chalā aayā huuñ sahrāoñ kī jānib

tumhāre dhyān meñ Duubā huā maiñ

ab apne-āp ko ḳhud DhūñDhtā huuñ

tumhārī khoj meñ niklā huā maiñ

mirī āñkhoñ meñ aañsū to nahīñ haiñ

magar huuñ ruuh tak bhīgā huā maiñ

banā.ī kis ne ye tasvīr sachchī

vo ubhrā chāñd ye Dhaltā huā maiñ

bahut chup hun ki hun chaunka hua main

zamin par aa gira uDta hua main

badan se jaan to ja hi chuki thi

kisi ne chhu liya zinda hua main

na jaane lafz kis duniya mein khoe

tumhaare samne gunga hua main

bhanwar mein chhoD aae the mujhe tum

kinare aa laga bahta hua main

ba-zahir dikh raha hun tanha tanha

kisi ke sath hun bichhDa hua main

chala aaya hun sahraon ki jaanib

tumhaare dhyan mein Duba hua main

ab apne-ap ko KHud DhunDhta hun

tumhaari khoj mein nikla hua main

meri aankhon mein aansu to nahin hain

magar hun ruh tak bhiga hua main

banai kis ne ye taswir sachchi

wo ubhra chand ye Dhalta hua main