bahut dinon se hai ji mein sawal puchhunga

bahut dinoñ se hai jī meñ savāl pūchhūñgā

maiñ tere aa.ine se terā haal pūchhūñgā

bahut hasīñ hai ye duniyā magar zavāl ke saath

ḳhudā se hashr meñ husn-e-zavāl pūchhūñgā

sukūt-e-shām se kyuuñ nisbat-e-tabī.at hai

sukūt-e-shām se vaj.h-e-malāl pūchhūñgā

tū be-misāl hai terī misāl kyā pūchhūñ

maiñ kuchh nahīñ magar apnī misāl pūchhūñgā

mirā ḳhayāl hai merī nigāh meñ hai jamāl

tire jamāl kā kyā hai ḳhayāl pūchhūñgā

ḳharāb aks haiñ shīsha-ba-dast kyuuñ saaqī

qusūr-e-bāda-e-jām-e-sifāl pūchhūñgā

fazā udaas hai jañgal kī saa.eñ saa.eñ hai 'shāz'

maiñ kis se vahshat-e-chashm-e-ġhazāl pūchhūñgā

bahut dinon se hai ji mein sawal puchhunga

main tere aaine se tera haal puchhunga

bahut hasin hai ye duniya magar zawal ke sath

KHuda se hashr mein husn-e-zawal puchhunga

sukut-e-sham se kyun nisbat-e-tabiat hai

sukut-e-sham se wajh-e-malal puchhunga

tu be-misal hai teri misal kya puchhun

main kuchh nahin magar apni misal puchhunga

mera KHayal hai meri nigah mein hai jamal

tere jamal ka kya hai KHayal puchhunga

KHarab aks hain shisha-ba-dast kyun saqi

qusur-e-baada-e-jam-e-sifal puchhunga

faza udas hai jangal ki saen saen hai 'shaz'

main kis se wahshat-e-chashm-e-ghazal puchhunga