bahut hain roz-e-sawab-o-gunah dekhne ko

bahut haiñ roz-e-savāb-o-gunāh dekhne ko

ki ham haiñ zindagi-e-be-panāh dekhne ko

banegī ab nazar inkār so ruke haiñ sabhī

ḳhud apnī aañkh se apnī nigāh dekhne ko

mirī navā ko jo pākīzgī atā kar de

taras rahā huuñ vo māsūm chaah dekhne ko

maiñ sañg-e-rāh nahīñ dil ke is do-rāhe par

khaḌā huā huuñ faqat apnī raah dekhne ko

milā diyā hameñ apnoñ se shukriya ai vaqt

yahī mile the hameñ yuuñ tabāh dekhne ko

tunuk-mizāj haiñ ham yuuñ na roz roz milo

bahut hai aao agar gaah gaah dekhne ko

jo mere baare meñ mujh se bhī mo'tabar hai koī

maiñ jī rahā huuñ tirā vo gavāh dekhne ko

sun ai hamāre siyāh o safed ke mālik

ham aa.e haiñ vo safed o siyāh dekhne ko

tum aañkh tak nahīñ malte machā ho jab kohrām

tum aañkh kholte ho sirf vaah dekhne ko

vo chup to yuuñ hai ki āgāh jin ko karnā thā

jiye na lamha-e-yak-intibāh dekhne ko

ye kis kī aah lagī ghar nahīñ koī miltā

har ik makān hai ḳhud sab kī raah dekhne ko

khulā ki dīda-e-ibrat nigāh koī na thā

uThī thī yuuñ to har ik kī nigāh dekhne ko

jo sab kī jaan kā janjāl ye nibāh hai 'talḳh'

maiñ sab ke saath huuñ bas vo nibāh dekhne ko

bahut hain roz-e-sawab-o-gunah dekhne ko

ki hum hain zindagi-e-be-panah dekhne ko

banegi ab nazar inkar so ruke hain sabhi

KHud apni aankh se apni nigah dekhne ko

meri nawa ko jo pakizgi ata kar de

taras raha hun wo masum chah dekhne ko

main sang-e-rah nahin dil ke is do-rahe par

khaDa hua hun faqat apni rah dekhne ko

mila diya hamein apnon se shukriya ai waqt

yahi mile the hamein yun tabah dekhne ko

tunuk-mizaj hain hum yun na roz roz milo

bahut hai aao agar gah gah dekhne ko

jo mere bare mein mujh se bhi mo'tabar hai koi

main ji raha hun tera wo gawah dekhne ko

sun ai hamare siyah o safed ke malik

hum aae hain wo safed o siyah dekhne ko

tum aankh tak nahin malte macha ho jab kohram

tum aankh kholte ho sirf wah dekhne ko

wo chup to yun hai ki aagah jin ko karna tha

jiye na lamha-e-yak-intibah dekhne ko

ye kis ki aah lagi ghar nahin koi milta

har ek makan hai KHud sab ki rah dekhne ko

khula ki dida-e-ibrat nigah koi na tha

uThi thi yun to har ek ki nigah dekhne ko

jo sab ki jaan ka janjal ye nibah hai 'talKH'

main sab ke sath hun bas wo nibah dekhne ko