bahut haqir hain hum ye guman badal Dalo

bahut haqīr haiñ ham ye gumāñ badal Daalo

uTho aur uTh ke ye tafsīr-e-jāñ badal Daalo

nigāh rahtī ho mahdūd jin kī phūloñ tak

tum aise tang-nazar bāġhbāñ badal Daalo

fazā-e-amn agar zindagī kī qātil ho

to inqilāb se amn-o-amāñ badal Daalo

ufuq pe surḳhī-e-azm-o-amal jhalak uTThī

nuzūl-e-sub.h hai ḳhvāb-e-girāñ badal Daalo

qadīm-o-kohna adab mohtaram sahī lekin

na.ī talāsh se tarz-e-bayāñ badal Daalo

'vaqār' ziist se paidā karo na.ī tārīḳh

jo sāzgār na hoñ surḳhiyāñ badal Daalo

bahut haqir hain hum ye guman badal Dalo

uTho aur uTh ke ye tafsir-e-jaan badal Dalo

nigah rahti ho mahdud jin ki phulon tak

tum aise tang-nazar baghban badal Dalo

faza-e-amn agar zindagi ki qatil ho

to inqilab se amn-o-aman badal Dalo

ufuq pe surKHi-e-azm-o-amal jhalak uTThi

nuzul-e-subh hai KHwab-e-giran badal Dalo

qadim-o-kohna adab mohtaram sahi lekin

nai talash se tarz-e-bayan badal Dalo

'waqar' zist se paida karo nai tariKH

jo sazgar na hon surKHiyan badal Dalo