bahut hi saf-o-shaffaf aa gaya taqdir se kaghaz

bahut hī sāf-o-shaffāf aa gayā taqdīr se kāġhaz

tumhāre vāste laayā huuñ maiñ kashmīr se kāġhaz

huā hai abru-e-jānāñ se dil-e-betāb sad-pāra

muqābil ho nahīñ saktā dam-e-shamshīr se kāġhaz

agar lohe ke gumbad meñ rakheñge aqrabā un ko

vahīñ pahuñchā.egā āshiq kisī tadbīr se kāġhaz

mirī qismat likhī jaatī thī jis din maiñ agar hotā

uḌā hī letā dast-e-kātib-e-taqdīr se kāġhaz

bhalā saada varaq par likhtā kyā rañgīñ-mizājoñ ko

munaqqash kar liyā thā pahle hī taqdīr se kāġhaz

kuchh us ḳhushbū kī had bhī hai mo.attar ho gayā bilkul

mire hāthoñ meñ vasf-e-gesū-e-shabgīr se kāġhaz

adū kā ḳhat hai yā ta.avīz hai jo yuuñ hai siine par

ye kyuuñ rakkhā gayā hai izzat-o-tauqīr se kāġhaz

ḳhat-e-taqdīr se behtar maiñ samjhūñ is ko duniyā meñ

tū likhvā laa.e gar qāsid but-e-be-pīr se kāġhaz

batā zālim mire qāsid ne terā kyā bigāḌā thā

jo le kar phaaḌ Daalā dast-e-be-taqsīr se kāġhaz

mire haath aa gayā 'parvīñ' adū ke naam kā ḳhat thā

girā thā rah meñ jo dast-e-but-e-be-pīr se kāġhaz

bahut hi saf-o-shaffaf aa gaya taqdir se kaghaz

tumhaare waste laya hun main kashmir se kaghaz

hua hai abru-e-jaanan se dil-e-betab sad-para

muqabil ho nahin sakta dam-e-shamshir se kaghaz

agar lohe ke gumbad mein rakhenge aqraba un ko

wahin pahunchaega aashiq kisi tadbir se kaghaz

meri qismat likhi jati thi jis din main agar hota

uDa hi leta dast-e-katib-e-taqdir se kaghaz

bhala sada waraq par likhta kya rangin-mizajon ko

munaqqash kar liya tha pahle hi taqdir se kaghaz

kuchh us KHushbu ki had bhi hai moattar ho gaya bilkul

mere hathon mein wasf-e-gesu-e-shabgir se kaghaz

adu ka KHat hai ya tawiz hai jo yun hai sine par

ye kyun rakkha gaya hai izzat-o-tauqir se kaghaz

KHat-e-taqdir se behtar main samjhun is ko duniya mein

tu likhwa lae gar qasid but-e-be-pir se kaghaz

bata zalim mere qasid ne tera kya bigaDa tha

jo le kar phaD Dala dast-e-be-taqsir se kaghaz

mere hath aa gaya 'parwin' adu ke nam ka KHat tha

gira tha rah mein jo dast-e-but-e-be-pir se kaghaz