bahut lamba safar tapti sulagti KHwahishon ka tha

bahut lambā safar taptī sulagtī ḳhvāhishoñ kā thā

magar saayā hamāre sar pe guzrī sā.atoñ kā thā

saroñ pe haath apne ghar kī bosīda chhatoñ kā thā

magar mahfūz sā manzar hamāre āñganoñ kā thā

kisī bhī sīdhe raste kā safar miltā use kyūñ-kar

ki vo masdūd ḳhud apne banā.e dā.eroñ kā thā

kabhī hañste hue aañsū kabhī rotī huī ḳhushiyāñ

karishma jo bhī thā saarā hamārī hī hisoñ kā thā

ḳhud apnī kāvishoñ se ham ne apnī qismateñ likkhīñ

magar kuchh haath in meñ bhī hamāre dushmanoñ kā thā

na.e rishte muqaddas ḳhvāb se āvāz dete the

magar aaseb sā dil par guzishta rābtoñ kā thā

kise miltī najāt 'āzād' hastī ke masā.il se

ki har koī muqayyad āb-o-gil ke silsiloñ kā thā

bahut lamba safar tapti sulagti KHwahishon ka tha

magar saya hamare sar pe guzri saaton ka tha

saron pe hath apne ghar ki bosida chhaton ka tha

magar mahfuz sa manzar hamare aanganon ka tha

kisi bhi sidhe raste ka safar milta use kyun-kar

ki wo masdud KHud apne banae daeron ka tha

kabhi hanste hue aansu kabhi roti hui KHushiyan

karishma jo bhi tha sara hamari hi hison ka tha

KHud apni kawishon se hum ne apni qismaten likkhin

magar kuchh hath in mein bhi hamare dushmanon ka tha

nae rishte muqaddas KHwab se aawaz dete the

magar aaseb sa dil par guzishta rabton ka tha

kise milti najat 'azad' hasti ke masail se

ki har koi muqayyad aab-o-gil ke silsilon ka tha