bahut ruswa kya is aashiqi ne har gali mujhko

bahut rusvā kyā is 'āshiqī ne har galī mujh ko

liye phirtī rahī har jā ye merī bekasī mujh ko

chhupā.e se nahīñ chhuptī haqīqat khul hī jaatī hai

sar-e-bāzār le aa.ī mirī dīvāngī mujh ko

ḳhabar kyā thī yahī ik din qayāmat mujh pe Dhā.egī

pasand aa.ī thī bachpan meñ tirī ye sādgī mujh ko

nigāh-e-nāz ne un kī mujhe ik armuġhāñ baḳhshā

milā darbār-e-ulfat se shu.ūr-e-zindagī mujh ko

dil-o-jān-o-jigar qurbān maiñ ne kar diye saare

rulātī hī rahī aksar tirī begāngī mujh ko

'jalālī' jāda-e-ulfat meñ jab se hai qadam rakkhā

rahī un ke tasavvur meñ hamesha bekalī mujh ko

bahut ruswa kya is 'ashiqi ne har gali mujh ko

liye phirti rahi har ja ye meri bekasi mujh ko

chhupae se nahin chhupti haqiqat khul hi jati hai

sar-e-bazar le aai meri diwangi mujh ko

KHabar kya thi yahi ek din qayamat mujh pe Dhaegi

pasand aai thi bachpan mein teri ye sadgi mujh ko

nigah-e-naz ne un ki mujhe ek armughan baKHsha

mila darbar-e-ulfat se shuur-e-zindagi mujh ko

dil-o-jaan-o-jigar qurban main ne kar diye sare

rulati hi rahi aksar teri begangi mujh ko

'jalali' jada-e-ulfat mein jab se hai qadam rakkha

rahi un ke tasawwur mein hamesha bekali mujh ko