bahut se logon ko gham ne jila ke mar diya

bahut se logoñ ko ġham ne jilā ke maar diyā

jo bach rahe the unheñ mai pilā ke maar diyā

ye kyā adā hai ki jab un kī barhamī se ham

na mar sake to hameñ muskurā ke maar diyā

na jaate aap to āġhosh kyuuñ tahī hotī

ga.e to aap ne pahlū se jā ke maar diyā

mujhe gila to nahīñ aap ke taġhāful se

magar huzūr ne himmat baḌhā ke maar diyā

na aap aas bañdhāte na ye sitam hotā

hameñ to aap ne amrit pilā ke maar diyā

kisī ne husn-e-taġhāful se jaañ talab kar lī

kisī ne lutf ke dariyā bahā ke maar diyā

jise bhī maiñ ne ziyāda tapāk se dekhā

usī hasīn ne patthar uThā ke maar diyā

vo log māñgeñge ab ziist kis ke āñchal se?

jinheñ huzūr ne dāman chhuḌā ke maar diyā

chale to ḳhanda-mizājī se jā rahe the ham

kisī hasīn ne raste meñ aa ke maar diyā

rah-e-hayāt meñ kuchh aise pech-o-ḳham to na the

kisī hasīn ne raste meñ aa ke maar diyā

karam kī sūrat-e-avval to jāñ-gudāz na thī

karam kā dūsrā pahlū dikhā ke maar diyā

ajiib ras-bharā rahzan thā jis ne logoñ ko

tarah tarah kī adā.eñ dikhā ke maar diyā

ajiib ḳhulq se ik ajnabī musāfir ne

hameñ ḳhilāf-e-tavaqqo.a bulā ke maar diyā

'adam' baḌe adab-ādāb se hasīnoñ ne

hameñ sitam kā nishāna banā ke maar diyā

ta.ayyunāt kī had tak to jī rahā thā 'adam'

ta.ayyunāt ke parde uThā ke maar diyā

bahut se logon ko gham ne jila ke mar diya

jo bach rahe the unhen mai pila ke mar diya

ye kya ada hai ki jab un ki barhami se hum

na mar sake to hamein muskura ke mar diya

na jate aap to aaghosh kyun tahi hoti

gae to aap ne pahlu se ja ke mar diya

mujhe gila to nahin aap ke taghaful se

magar huzur ne himmat baDha ke mar diya

na aap aas bandhate na ye sitam hota

hamein to aap ne amrit pila ke mar diya

kisi ne husn-e-taghaful se jaan talab kar li

kisi ne lutf ke dariya baha ke mar diya

jise bhi main ne ziyaada tapak se dekha

usi hasin ne patthar uTha ke mar diya

wo log mangenge ab zist kis ke aanchal se?

jinhen huzur ne daman chhuDa ke mar diya

chale to KHanda-mizaji se ja rahe the hum

kisi hasin ne raste mein aa ke mar diya

rah-e-hayat mein kuchh aise pech-o-KHam to na the

kisi hasin ne raste mein aa ke mar diya

karam ki surat-e-awwal to jaan-gudaz na thi

karam ka dusra pahlu dikha ke mar diya

ajib ras-bhara rahzan tha jis ne logon ko

tarah tarah ki adaen dikha ke mar diya

ajib KHulq se ek ajnabi musafir ne

hamein KHilaf-e-tawaqqoa bula ke mar diya

'adam' baDe adab-adab se hasinon ne

hamein sitam ka nishana bana ke mar diya

tayyunat ki had tak to ji raha tha 'adam'

tayyunat ke parde uTha ke mar diya