baiTh jata tha main thak kar apne tan ki chhanw mein

baiTh jaatā thā maiñ thak kar apne tan kī chhāñv meñ

ek ghar hotā thā apne naam kā us gaañv meñ

qatre qatre ko tarastā hī rahā maiñ umr bhar

go safar kartā rahā maiñ umr bhar dariyāoñ meñ

mar ke jiitā thā kabhī maiñ jī ke martā thā kabhī

ḳhush-nasībī thī safar kartā thā do duniyāoñ meñ

dekhtī āñkhoñ se ham chup-chāp sunte hī rahe

guftugū jaarī thī rañg-e-gul pe nā-bīnāoñ meñ

shahr meñ rahte hue tanhā.ī kā ye haal thā

maiñ ghirā rahtā thā jaise be-karāñ sahrāoñ meñ

jis shajar ko kaaT kar us ne haTāyā raah se

rah chukā thā vo shajar us ke karam-farmāoñ meñ

ḳhvāb meñ 'ālam' ne auj-e-arsh tak parvāz kī

aur jaage to vahī chakkar thā apne paañv meñ

baiTh jata tha main thak kar apne tan ki chhanw mein

ek ghar hota tha apne nam ka us ganw mein

qatre qatre ko tarasta hi raha main umr bhar

go safar karta raha main umr bhar dariyaon mein

mar ke jita tha kabhi main ji ke marta tha kabhi

KHush-nasibi thi safar karta tha do duniyaon mein

dekhti aankhon se hum chup-chap sunte hi rahe

guftugu jari thi rang-e-gul pe na-binaon mein

shahr mein rahte hue tanhai ka ye haal tha

main ghira rahta tha jaise be-karan sahraon mein

jis shajar ko kaT kar us ne haTaya rah se

rah chuka tha wo shajar us ke karam-farmaon mein

KHwab mein 'alam' ne auj-e-arsh tak parwaz ki

aur jage to wahi chakkar tha apne panw mein