baiThe baiThe pareshaniyan baDh gain

baiThe baiThe pareshāniyāñ baḌh ga.iiñ

dil lagāyā to tanhā.iyāñ baḌh ga.iiñ

pal-do-pal kī mulāqāt se kyā milā

aur bhī dil kī betābiyāñ baḌh ga.iiñ

tum ko takne kā ik fā.eda ye huā

merī āñkhoñ kī bīnā.iyāñ baḌh ga.iiñ

ik kalī baaġh meñ phuul kyā ban ga.ī

bhañvre aane lage titliyāñ baḌh ga.iiñ

apnī aulād jab aa ga.ī darmiyāñ

bhaa.ī kī bhaa.ī se dūriyāñ baḌh ga.iiñ

bas yahī soch kar Dar rahā huuñ maiñ 'rāz'

kyoñ azīzoñ kī hamdardiyāñ baḌh ga.iiñ

baiThe baiThe pareshaniyan baDh gain

dil lagaya to tanhaiyan baDh gain

pal-do-pal ki mulaqat se kya mila

aur bhi dil ki betabiyan baDh gain

tum ko takne ka ek faeda ye hua

meri aankhon ki binaiyan baDh gain

ek kali bagh mein phul kya ban gai

bhanwre aane lage titliyan baDh gain

apni aulad jab aa gai darmiyan

bhai ki bhai se duriyan baDh gain

bas yahi soch kar Dar raha hun main 'raaz'

kyon azizon ki hamdardiyan baDh gain