baiThe hue hain hum KHud aankhon mein dhul Dale

baiThe hue haiñ ham ḳhud āñkhoñ meñ dhuul Daale

ai rū-e-yār tū ne parde fuzūl Daale

jhagḌā hī tum chukā do jab teġh khīñch lī hai

aafat meñ phir na mujh ko jān-e-malūl Daale

sūrat to ek hī thī do ghar hue to kyā hai

dair-o-haram kī bābat jhagḌe fuzūl Daale

turbat se koī pūchhe nairañgī-e-zamāna

ba.azoñ ne ḳhaak Daalī ba.azoñ ne phuul Daale

kahte haiñ jis ko jalva vo bhī kahīñ rukā hai

aaḌeñ fuzūl kī haiñ parde fuzūl Daale

sadqe dil-o-jigar ko mizhgāñ pe kar chukā huuñ

maiñ ne to apne hāthoñ kāñToñ pe phuul Daale

kaise hisāb joḌūñ a.amāl-e-ma.asiyat kā

jab us kī shān-e-rahmat gintī meñ bhuul Daale

'muztar' diloñ ke andar rakhne ke the ye kāfir

dozaḳh meñ kyuuñ ḳhudā ne jannat ke phuul Daale

baiThe hue hain hum KHud aankhon mein dhul Dale

ai ru-e-yar tu ne parde fuzul Dale

jhagDa hi tum chuka do jab tegh khinch li hai

aafat mein phir na mujh ko jaan-e-malul Dale

surat to ek hi thi do ghar hue to kya hai

dair-o-haram ki babat jhagDe fuzul Dale

turbat se koi puchhe nairangi-e-zamana

bazon ne KHak Dali bazon ne phul Dale

kahte hain jis ko jalwa wo bhi kahin ruka hai

aaDen fuzul ki hain parde fuzul Dale

sadqe dil-o-jigar ko mizhgan pe kar chuka hun

main ne to apne hathon kanTon pe phul Dale

kaise hisab joDun aamal-e-masiyat ka

jab us ki shan-e-rahmat ginti mein bhul Dale

'muztar' dilon ke andar rakhne ke the ye kafir

dozaKH mein kyun KHuda ne jannat ke phul Dale