baiThe jo sham se tere dar pe sahar hui

baiThe jo shaam se tire dar pe sahar huī

afsos ai qamar ki na mutlaq ḳhabar huī

armān-e-vasl yūñhī rahā so ga.e nasīb

jab aañkh khul ga.ī to yakāyak sahar huī

dil āshiqoñ ke chhid ga.e tirchhī nigāh se

mizhgāñ kī nok-e-dushman-e-jānī jigar huī

pachhtātā huuñ ki aañkh abas tum se laḌ ga.ī

barchhī hamāre haq meñ tumhārī nazar huī

chhānī kahāñ na ḳhaak na paayā kahīñ tumheñ

miTTī mirī ḳharāb abas dar-ba-dar huī

dhyān aa gayā jo shaam ko us zulf kā 'rasā'

uljhan meñ saarī raat hamārī basar huī

baiThe jo sham se tere dar pe sahar hui

afsos ai qamar ki na mutlaq KHabar hui

arman-e-wasl yunhi raha so gae nasib

jab aankh khul gai to yakayak sahar hui

dil aashiqon ke chhid gae tirchhi nigah se

mizhgan ki nok-e-dushman-e-jaani jigar hui

pachhtata hun ki aankh abas tum se laD gai

barchhi hamare haq mein tumhaari nazar hui

chhani kahan na KHak na paya kahin tumhein

miTTi meri KHarab abas dar-ba-dar hui

dhyan aa gaya jo sham ko us zulf ka 'rasa'

uljhan mein sari raat hamari basar hui