baiThe rahenge wo to hamesha daba ke baat

baiThe raheñge vo to hamesha dabā ke baat

ham hī kareñge un se kisī roz jā ke baat

kuchh bhī nikāl sakte haiñ matlab vo baat kā

kartā huuñ is liye maiñ bahut bach-bachā ke baat

pechīda ho ga.e haiñ hamāre ta.alluqāt

karnī paḌī hai mujh ko ghumā ke phirā ke baat

ik ham ki le ke baiTh ga.e ek lafz ko

ik vo ki chal diye jo hañsī meñ uḌā ke baat

kahtā huuñ dil kī baat ghaTā kar raqīb se

kartā hai vo jo aage baḌhā ke chaḌhā ke baat

vo jo banī huī hai rukāvaT sī darmiyāñ

milnā ho ab hameñ to mileñ vo haTā ke baat

matlūb vā.izoñ ko haiñ shāyad hamāre ashk

hañsne kī bhī vo karte haiñ aksar rulā ke baat

'bāsir' bayān-e-sāda ko paayā hai be-asar

kiije zarā sañvār ke qadre banā ke baat

baiThe rahenge wo to hamesha daba ke baat

hum hi karenge un se kisi roz ja ke baat

kuchh bhi nikal sakte hain matlab wo baat ka

karta hun is liye main bahut bach-bacha ke baat

pechida ho gae hain hamare talluqat

karni paDi hai mujh ko ghuma ke phira ke baat

ek hum ki le ke baiTh gae ek lafz ko

ek wo ki chal diye jo hansi mein uDa ke baat

kahta hun dil ki baat ghaTa kar raqib se

karta hai wo jo aage baDha ke chaDha ke baat

wo jo bani hui hai rukawaT si darmiyan

milna ho ab hamein to milen wo haTa ke baat

matlub waizon ko hain shayad hamare ashk

hansne ki bhi wo karte hain aksar rula ke baat

'basir' bayan-e-sada ko paya hai be-asar

kije zara sanwar ke qadre bana ke baat