baKHsh de kuchh to etibar mujhe

baḳhsh de kuchh to e'tibār mujhe

pyaar se dekh chashm-e-yār mujhe

raat bhī chāñd bhī samundar bhī

mil ga.e kitne ġham-gusār mujhe

raushnī aur kuchh baḌhā jā.ūñ

soz-e-ġham aur bhī nikhār mujhe

kuchh hī din meñ bahār aa jaatī

aur karnā thā intizār mujhe

dekh duniyā ye paiñtare na badal

dekh shīshe meñ mat utaar mujhe

aa.ine meñ nazar nahīñ aatā

apnā chehra kabhī-kabhār mujhe

kis qadar shoḳh ho ke taktā thā

raat band-e-qabā-e-yār mujhe

dekh maiñ sā'at-e-masarrat huuñ

itnī ujlat se mat guzār mujhe

markab-e-ḳhāk par savār huuñ maiñ

dekh ai shahr-e-zar-nigār mujhe

rizq-e-maqsūm khā ke jiinā thā

khā ga.ī fikr-e-rozgār mujhe

baKHsh de kuchh to e'tibar mujhe

pyar se dekh chashm-e-yar mujhe

raat bhi chand bhi samundar bhi

mil gae kitne gham-gusar mujhe

raushni aur kuchh baDha jaun

soz-e-gham aur bhi nikhaar mujhe

kuchh hi din mein bahaar aa jati

aur karna tha intizar mujhe

dekh duniya ye paintare na badal

dekh shishe mein mat utar mujhe

aaine mein nazar nahin aata

apna chehra kabhi-kabhaar mujhe

kis qadar shoKH ho ke takta tha

raat band-e-qaba-e-yar mujhe

dekh main sa'at-e-masarrat hun

itni ujlat se mat guzar mujhe

markab-e-KHak par sawar hun main

dekh ai shahr-e-zar-nigar mujhe

rizq-e-maqsum kha ke jina tha

kha gai fikr-e-rozgar mujhe