baKHshish hai teri hath mein duniya liye hue

baḳhshish hai terī haath meñ duniyā liye hue

maiñ chup khaḌā huuñ dīda-e-bīnā liye hue

sahrā ko kyā ḳhabar ki hai har zarra-e-haqīr

muTThī meñ apnī qismat-e-sahrā liye hue

us shaam se Daro jo sitāroñ kī chhāñv meñ

aatī ho ik hasīn añdherā liye hue

ai vaqt ik nigāh ki kab se khaḌe haiñ ham

ā.īna-e-tasavvur-e-fardā liye hue

guzrā thā is dayār se sūraj kā ik safīr

har naqsh-e-pā meñ ik yad-e-baizā liye hue

aayā ye kaun sāya-e-zulf-e-darāz meñ

peshāni-e-sahar kā ujālā liye hue

laa.ī thī be-ḳhudī jise is dar pe vo 'jamīl'

jaatā hai ab ḳhudī kā janāzā liye hue

baKHshish hai teri hath mein duniya liye hue

main chup khaDa hun dida-e-bina liye hue

sahra ko kya KHabar ki hai har zarra-e-haqir

muTThi mein apni qismat-e-sahra liye hue

us sham se Daro jo sitaron ki chhanw mein

aati ho ek hasin andhera liye hue

ai waqt ek nigah ki kab se khaDe hain hum

aaina-e-tasawwur-e-farda liye hue

guzra tha is dayar se suraj ka ek safir

har naqsh-e-pa mein ek yad-e-baiza liye hue

aaya ye kaun saya-e-zulf-e-daraaz mein

peshani-e-sahar ka ujala liye hue

lai thi be-KHudi jise is dar pe wo 'jamil'

jata hai ab KHudi ka janaza liye hue