baKHt kya jaane bhala ya ki bura hota hai

baḳht kyā jaane bhalā yā ki burā hotā hai

kaif-o-ġham zarf ke laa.eq hī atā hotā hai

ye vo bāzār-e-kashākash hai jahāñ par insāñ

hasb-e-taufīq ḳharīdār-e-hayā hotā hai

muddatoñ rahtā hai jab aadmī zahmat-ba-kanār

rāz-e-sar-basta mahākāt kā vā hotā hai

dil hai dozaḳh meñ kuchh is tarah tabassum-bar-lab

jaise kāñToñ meñ koī phuul khilā hotā hai

be-talab roz atā kartā hai kāñToñ ko lahū

kitnā īsār-pasand ābla-pā hotā hai

sab ko pairāhan-e-gul kī hai tamannā lekin

har nafas aish kā paiġhām-e-qazā hotā hai

ātish-e-batn meñ gal jaate haiñ ḳhud-kām shuyūḳh

sāhab-e-dard parastār-e-ḳhudā hotā hai

terī rahmat se hai mahfūz anishshar banda

varna insān to tasvīr-e-ḳhatā hotā hai

pahlū-e-zarra meñ pinhāñ hai jahān-e-ma.anī

resha-e-sañg meñ ā.īna-sarā hotā hai

ain ġhurbat meñ nikhartā hai ḳhudī kā jauhar

naḳhl-e-ausāf lahū pī ke harā hotā hai

sabr kī shāḳh meñ lagtā hai vo mīThā meva

sab se duniyā meñ alag jis kā mazā hotā hai

ham faqīroñ ko sahāre kī zarūrat kyā hai

be sahāroñ kā sahārā to ḳhudā hotā hai

terā har sher hai 'bebāk' amal kī dāvat

yā koī mūsī-e-imrāñ kā asā hotā hai

baKHt kya jaane bhala ya ki bura hota hai

kaif-o-gham zarf ke laeq hi ata hota hai

ye wo bazar-e-kashakash hai jahan par insan

hasb-e-taufiq KHaridar-e-haya hota hai

muddaton rahta hai jab aadmi zahmat-ba-kanar

raaz-e-sar-basta mahakat ka wa hota hai

dil hai dozaKH mein kuchh is tarah tabassum-bar-lab

jaise kanTon mein koi phul khila hota hai

be-talab roz ata karta hai kanTon ko lahu

kitna isar-pasand aabla-pa hota hai

sab ko pairahan-e-gul ki hai tamanna lekin

har nafas aish ka paigham-e-qaza hota hai

aatish-e-batn mein gal jate hain KHud-kaam shuyuKH

sahab-e-dard parastar-e-KHuda hota hai

teri rahmat se hai mahfuz anishshar banda

warna insan to taswir-e-KHata hota hai

pahlu-e-zarra mein pinhan hai jahan-e-mani

resha-e-sang mein aaina-sara hota hai

ain ghurbat mein nikharta hai KHudi ka jauhar

naKHl-e-ausaf lahu pi ke hara hota hai

sabr ki shaKH mein lagta hai wo miTha mewa

sab se duniya mein alag jis ka maza hota hai

hum faqiron ko sahaare ki zarurat kya hai

be sahaaron ka sahaara to KHuda hota hai

tera har sher hai 'bebak' amal ki dawat

ya koi musi-e-imran ka asa hota hai