bala se hain jo ye pesh-e-nazar dar-o-diwar

balā se haiñ jo ye pesh-e-nazar dar-o-dīvār

nigāh-e-shauq ko haiñ bāl-o-par dar-o-dīvār

vufūr-e-ashk ne kāshāne kā kiyā ye rañg

ki ho ga.e mire dīvār-o-dar dar-o-dīvār

nahīñ hai saaya ki sun kar naved-e-maqdam-e-yār

ga.e haiñ chand qadam pesh-tar dar-o-dīvār

huī hai kis qadar arzāni-e-mai-e-jalva

ki mast hai tire kūche meñ har dar-o-dīvār

jo hai tujhe sar-e-saudā-e-intizār to aa

ki haiñ dukān-e-matā-e-nazar dar-o-dīvār

hujūm-e-girya kā sāmān kab kiyā maiñ ne

ki gir paḌe na mire paañv par dar-o-dīvār

vo aa rahā mire ham-sā.e meñ to saa.e se

hue fidā dar-o-dīvār par dar-o-dīvār

nazar meñ khaTke hai bin tere ghar kī ābādī

hamesha rote haiñ ham dekh kar dar-o-dīvār

na pūchh be-ḳhudi-e-aish-e-maqdam-e-sailāb

ki nāchte haiñ paḌe sar-ba-sar dar-o-dīvār

na kah kisī se ki 'ġhālib' nahīñ zamāne meñ

harīf-e-rāz-e-mohabbat magar dar-o-dīvār

bala se hain jo ye pesh-e-nazar dar-o-diwar

nigah-e-shauq ko hain baal-o-par dar-o-diwar

wufur-e-ashk ne kashane ka kiya ye rang

ki ho gae mere diwar-o-dar dar-o-diwar

nahin hai saya ki sun kar nawed-e-maqdam-e-yar

gae hain chand qadam pesh-tar dar-o-diwar

hui hai kis qadar arzani-e-mai-e-jalwa

ki mast hai tere kuche mein har dar-o-diwar

jo hai tujhe sar-e-sauda-e-intizar to aa

ki hain dukan-e-mata-e-nazar dar-o-diwar

hujum-e-girya ka saman kab kiya main ne

ki gir paDe na mere panw par dar-o-diwar

wo aa raha mere ham-sae mein to sae se

hue fida dar-o-diwar par dar-o-diwar

nazar mein khaTke hai bin tere ghar ki aabaadi

hamesha rote hain hum dekh kar dar-o-diwar

na puchh be-KHudi-e-aish-e-maqdam-e-sailab

ki nachte hain paDe sar-ba-sar dar-o-diwar

na kah kisi se ki 'ghaalib' nahin zamane mein

harif-e-raaz-e-mohabbat magar dar-o-diwar