ban gaya tadbir se har rasta taqdir ka

ban gayā tadbīr se har rāsta taqdīr kā

ab nahīñ kuchh ḳhauf pairoñ ko kisī zanjīr kā

kar diyā ḳhāmosh sho.aloñ ne jalā kar har varaq

lafz phir bhī chīḳhtā ik rah gayā tahrīr kā

ḳhaak sargardāñ hai har sū kuchh nahīñ badlā yahāñ

dekhtī haiñ ab bhī rāheñ rāsta rahgīr kā

ek ruḳh par thiiñ bahāreñ ek ruḳh be-rañg-o-nūr

aur merī samt thā be-rañg ruḳh tasvīr kā

jab nishāne par mire dil ke sivā kuchh bhī na thā

phir asar hotā na kyuuñ terī nazar ke tiir kā

ham faqīrī meñ 'alīnā' shaad haiñ ābād haiñ

kyā hameñ karnā hai terī daulat-o-jāgīr kā

ban gaya tadbir se har rasta taqdir ka

ab nahin kuchh KHauf pairon ko kisi zanjir ka

kar diya KHamosh shoalon ne jala kar har waraq

lafz phir bhi chiKHta ek rah gaya tahrir ka

KHak sargardan hai har su kuchh nahin badla yahan

dekhti hain ab bhi rahen rasta rahgir ka

ek ruKH par thin bahaaren ek ruKH be-rang-o-nur

aur meri samt tha be-rang ruKH taswir ka

jab nishane par mere dil ke siwa kuchh bhi na tha

phir asar hota na kyun teri nazar ke tir ka

hum faqiri mein 'alina' shad hain aabaad hain

kya hamein karna hai teri daulat-o-jagir ka