bana de aur bhi kuchh dur ki sada mujhko

banā de aur bhī kuchh duur kī sadā mujh ko

ye jitne fāsle mumkin haiñ sab dikhā mujh ko

har ek chehre ko pahchānñe kī koshish ne

har ek chehre kī uljhan banā diyā mujh ko

thakā thakā sā tasalsul banā ke dariyā kā

ye phailtā huā sahrā na ab banā mujh ko

maiñ silsila huuñ sadāoñ ke TuuT jaane kā

to soch kar hī dobāra sadā banā mujh ko

tū merī baat hai to guuñj jā mire andar

maiñ terī chup huuñ to phir toḌ kar dikhā mujh ko

maiñ sun rahā huuñ har ek choT meñ sadā apnī

ruke na haath tirā toḌtā hī jā mujh ko

merā ḳhayāl hai ghar ke bahut qarīb huuñ maiñ

har ek lamha na yuuñ varna dekhtā mujh ko

ye log kyā haiñ kisī kā koī vajūd bhī hai

ye ār-pār nazar aa rahā hai kyā mujh ko

ajab thakan huuñ kisī se na kuchh bhī kahne kī

ajab tarah ye paḌā ḳhud se vāsta mujh ko

maiñ apne dhyān se ḳhud hī utar gayā thā talḳh

sabhī ġhalat haiñ kisī ne nahīñ sunā mujh ko

bana de aur bhi kuchh dur ki sada mujh ko

ye jitne fasle mumkin hain sab dikha mujh ko

har ek chehre ko pahchanne ki koshish ne

har ek chehre ki uljhan bana diya mujh ko

thaka thaka sa tasalsul bana ke dariya ka

ye phailta hua sahra na ab bana mujh ko

main silsila hun sadaon ke TuT jaane ka

to soch kar hi dobara sada bana mujh ko

tu meri baat hai to gunj ja mere andar

main teri chup hun to phir toD kar dikha mujh ko

main sun raha hun har ek choT mein sada apni

ruke na hath tera toDta hi ja mujh ko

mera KHayal hai ghar ke bahut qarib hun main

har ek lamha na yun warna dekhta mujh ko

ye log kya hain kisi ka koi wajud bhi hai

ye aar-par nazar aa raha hai kya mujh ko

ajab thakan hun kisi se na kuchh bhi kahne ki

ajab tarah ye paDa KHud se wasta mujh ko

main apne dhyan se KHud hi utar gaya tha talKH

sabhi ghalat hain kisi ne nahin suna mujh ko