bana hai apne aalam mein wo kuchh aalam jawani ka

banā hai apne aalam meñ vo kuchh aalam javānī kā

ki umr-e-ḳhizr se behtar hai ek ik dam javānī kā

nahīñ būḌhoñ kī dāḌhī par miyāñ ye rañg vasme kā

kiyā hai un ke ek ek baal ne mātam javānī kā

ye būḌhe go ki apne muñh se shaiḳhī meñ nahīñ kahte

bharā hai aah par in sab ke dil meñ ġham javānī kā

ye pīrān-e-jahāñ is vāste rote haiñ ab har dam

ki kyā kyā in kā hañgāma huā barham javānī kā

kisī kī piiTh kubḌī ko bhalā ḳhātir meñ kyā laave

akaḌ meñ naujavānī ke jo maare dam javānī kā

sharāb o gul-badan saaqī maze aish-o-tarab har-dam

bahār-e-zindagī kahiye to hai mausam javānī kā

'nazīr' ab ham uḌāte haiñ maze kyā kyā ahā-hā-hā

banāyā hai ajab allāh ne aalam javānī kā

bana hai apne aalam mein wo kuchh aalam jawani ka

ki umr-e-KHizr se behtar hai ek ek dam jawani ka

nahin buDhon ki daDhi par miyan ye rang wasme ka

kiya hai un ke ek ek baal ne matam jawani ka

ye buDhe go ki apne munh se shaiKHi mein nahin kahte

bhara hai aah par in sab ke dil mein gham jawani ka

ye piran-e-jahan is waste rote hain ab har dam

ki kya kya in ka hangama hua barham jawani ka

kisi ki piTh kubDi ko bhala KHatir mein kya lawe

akaD mein naujawani ke jo mare dam jawani ka

sharab o gul-badan saqi maze aish-o-tarab har-dam

bahaar-e-zindagi kahiye to hai mausam jawani ka

'nazir' ab hum uDate hain maze kya kya aha-ha-ha

banaya hai ajab allah ne aalam jawani ka