bana husn-e-takallum husn-e-zan aahista aahista

banā husn-e-takallum husn-e-zan āhista āhista

bahar-sūrat khulā ik kam-suḳhan āhista āhista

musāfir raah meñ hai shaam gahrī hotī jaatī hai

sulagtā hai tirī yādoñ kā ban āhista āhista

dhuāñ dil se uThe chehre tak aa.e nuur ho jaa.e

baḌī mushkil se aatā hai ye fan āhista āhista

abhī to sañg-e-tiflāñ kā hadaf banñā hai kūchoñ meñ

ki raas aatā hai ye dīvāna-pan āhista āhista

abhī to imtihān-e-ābla-pā hai bayābāñ meñ

baneñge kunj-e-gul dasht-o-daman āhista āhista

abhī kyūñkar kahūñ zer-e-naqāb-e-surmagīñ kyā hai

badaltā hai zamāne kā chalan āhista āhista

meñ ahl-e-anjuman kī ḳhalvat-e-dil kā muġhannī huuñ

mujhe pahchān legī anjuman āhista āhista

dil-e-har-sañg goyā sham-e-mehrāb-e-tamannā hai

asar kartī hai zarb-e-kohkan āhista āhista

kisī kāfir kī shoḳhī ne kahlavā.ī ġhazal mujh se

khulegā 'shāz' ab rañg-e-suḳhan āhista āhista

bana husn-e-takallum husn-e-zan aahista aahista

bahar-surat khula ek kam-suKHan aahista aahista

musafir rah mein hai sham gahri hoti jati hai

sulagta hai teri yaadon ka ban aahista aahista

dhuan dil se uThe chehre tak aae nur ho jae

baDi mushkil se aata hai ye fan aahista aahista

abhi to sang-e-tiflan ka hadaf banna hai kuchon mein

ki ras aata hai ye diwana-pan aahista aahista

abhi to imtihan-e-abla-pa hai bayaban mein

banenge kunj-e-gul dasht-o-daman aahista aahista

abhi kyunkar kahun zer-e-naqab-e-surmagin kya hai

badalta hai zamane ka chalan aahista aahista

mein ahl-e-anjuman ki KHalwat-e-dil ka mughanni hun

mujhe pahchan legi anjuman aahista aahista

dil-e-har-sang goya sham-e-mehrab-e-tamanna hai

asar karti hai zarb-e-kohkan aahista aahista

kisi kafir ki shoKHi ne kahlawai ghazal mujh se

khulega 'shaz' ab rang-e-suKHan aahista aahista