bana ke taj-mahal KHud use giraunga

banā ke tāj-mahal ḳhud use girā.uñgā

mohabbatoñ meñ baġhāvat hai kyā dikhā.ūñgā

qalam lagā ke adāvat ke peḌ-paudoñ meñ

jo shāḳh sabr kā phal de vahī ugāñgā

utar chukī hai mirī ruuh meñ shab-e-hijrāñ

maiñ us ko hijr kī mankūha ab banā.ūñgā

ġhamoñ kī aañch par aañsū ubaal kar apne

maiñ apne zabt kī quvvat ko āzmā.ūñgā

chalā huuñ bād-e-muḳhālif maiñ ek muddat se

na chheḌo mujh ko vagarna tumheñ rulā.uñgā

karo na fikr sitāroñ kī chaal jo bhī ho

uThā ke chāñd chakorī ke paas lā.ūñgā

lagā ke siine se maiñ rāstoñ ke ye patthar

ḳhizāñ meñ giit bahāroñ ke gungunā.uñgā

maiñ tishnagī ko miTāne ke vāste sahrā

laboñ se tere maiñ ye aable lagā.ūñgā

bhañvar ke pairoñ meñ hasrat ke bāñdh kar ghuñghrū

gar iḳhtiyār meñ hogā to maiñ nachauñgā

maiñ ek mauj-e-'nasīmī' huuñ bastiyāñ dil kī

sarāb-e-dasht tire sāmne basā.ūñgā

bana ke taj-mahal KHud use giraunga

mohabbaton mein baghawat hai kya dikhaunga

qalam laga ke adawat ke peD-paudon mein

jo shaKH sabr ka phal de wahi uganga

utar chuki hai meri ruh mein shab-e-hijran

main us ko hijr ki mankuha ab banaunga

ghamon ki aanch par aansu ubaal kar apne

main apne zabt ki quwwat ko aazmaunga

chala hun baad-e-muKHalif main ek muddat se

na chheDo mujh ko wagarna tumhein rulaunga

karo na fikr sitaron ki chaal jo bhi ho

uTha ke chand chakori ke pas launga

laga ke sine se main raston ke ye patthar

KHizan mein git bahaaron ke gungunaunga

main tishnagi ko miTane ke waste sahra

labon se tere main ye aable lagaunga

bhanwar ke pairon mein hasrat ke bandh kar ghunghru

gar iKHtiyar mein hoga to main nachaunga

main ek mauj-e-'nasimi' hun bastiyan dil ki

sarab-e-dasht tere samne basaunga