banda agar jahan mein bajae KHuda nahin

banda agar jahāñ meñ bajā.e ḳhudā nahīñ

lekin nazar karo to ḳhudā se judā nahīñ

nuqte kā farq hai gā ḳhudā aur judā meñ dekh

sūrat meñ gar chhupā hai ba-ma.anī chhupā nahīñ

har shai ke biich aap nihāñ ho ayaañ huā

dekhā to ham ne us sā koī ḳhud-numā nahīñ

hairān aql-e-kul kī hai us kī sifat ko dekh

sab jā meñ jalva-gar hai magar ek jā nahīñ

lazzat chakhā ke dil ke ta.iiñ hijr o vasl kī

'hātim' se mil rahā hai aur ab tak milā nahīñ

banda agar jahan mein bajae KHuda nahin

lekin nazar karo to KHuda se juda nahin

nuqte ka farq hai ga KHuda aur juda mein dekh

surat mein gar chhupa hai ba-mani chhupa nahin

har shai ke bich aap nihan ho ayan hua

dekha to hum ne us sa koi KHud-numa nahin

hairan aql-e-kul ki hai us ki sifat ko dekh

sab ja mein jalwa-gar hai magar ek ja nahin

lazzat chakha ke dil ke tain hijr o wasl ki

'hatim' se mil raha hai aur ab tak mila nahin