banda-parwar aap ki to zindagi aabaad hai

banda-parvar aap kī to zindagī ābād hai

aap ko is se ġharaz kyā gar koī barbād hai

hai ijāzat aap to mashk-e-sitam farmā.iye

ham ġharīboñ kā kaleja bā-ḳhudā faulād hai

apnā apnā hai muqaddar apnā apnā hai nasīb

hai koī ābād duniyā meñ koī barbād hai

ḳhuun insāñ kā bahāte haiñ jo paanī kī tarah

aise logoñ kī badaulat gulsitāñ barbād hai

kis qadar mushkil hai khul kar saañs lenā bhī yahāñ

sirf kahne ke liye apnā vatan āzād hai

naujavāñ hāthoñ meñ hai is mulk kī taqdīr ab

naujavāñ hāthoñ ke dam se mulk ye ābād hai

titliyoñ ke pīchhe pīchhe dauḌnā vo har taraf

aaj tak ham ko laḌakpan kā zamāna yaad hai

kis qadar rañgī zamāna thā vo bachpan kā 'mukesh'

kuchh tumheñ bhī yaad hogā kuchh mujhe bhī yaad hai

banda-parwar aap ki to zindagi aabaad hai

aap ko is se gharaz kya gar koi barbaad hai

hai ijazat aap to mashk-e-sitam farmaiye

hum gharibon ka kaleja ba-KHuda faulad hai

apna apna hai muqaddar apna apna hai nasib

hai koi aabaad duniya mein koi barbaad hai

KHun insan ka bahate hain jo pani ki tarah

aise logon ki badaulat gulsitan barbaad hai

kis qadar mushkil hai khul kar sans lena bhi yahan

sirf kahne ke liye apna watan aazad hai

naujawan hathon mein hai is mulk ki taqdir ab

naujawan hathon ke dam se mulk ye aabaad hai

titliyon ke pichhe pichhe dauDna wo har taraf

aaj tak hum ko laDakpan ka zamana yaad hai

kis qadar rangi zamana tha wo bachpan ka 'mukesh'

kuchh tumhein bhi yaad hoga kuchh mujhe bhi yaad hai