bane ho KHak se to KHaksari ho tabiat mein

bane ho ḳhaak se to ḳhāksārī ho tabī.at meñ

tabī.at aisī bantī hai to bantī hai mohabbat meñ

bahā.e jaao aañsū umr-bhar us kī mohabbat meñ

ki aise log motī ke mahal paate haiñ jannat meñ

kahā hāzir meñ kuchh hujjat nahīñ phir mudda.ā pūchhā

sitamgar ne palaT dī baat ab hāzir hai hujjat meñ

kisī se apne haq meñ kuchh sunā bhī hai to jaane do

burā to bādshāh ko bhī kahā karte haiñ ġhībat meñ

mohabbat kī zarā sī baat par itne ḳhafā kyuuñ ho

huā kartī haiñ āḳhir saikḌoñ bāteñ mohabbat meñ

nahīñ lā saktā har ik kohkan farhād kī qismat

ḳhudā baḳhshe baḌā insān guzrā chhoTī ummat meñ

tirī har ek tasvīr ik adā-e-ḳhās rakhtī hai

kare kyā farq ab koī zarūrat aur zīnat meñ

ye kyā saa.il ke muñh par toḌ kar TukḌā sā rakh denā

are bande ḳhudā ko muñh dikhānā hai qayāmat meñ

jo badle dost kā bhes us ko dushman kis tarah jānoñ

gayā hazrat kalīm-ullāh kā naqqāl jannat meñ

mohabbat be-itā.at ek dhoka hai mohabbat kā

mohabbat kā jo da.avā hai to koshish kar itā.at meñ

mohabbat aur mehnat kohkan ne ye bhī kī vo bhī

ulaT hai ek nuqte kī mohabbat aur mehnat meñ

safī' duniyā meñ jiine kā maza kuchh bhī nahīñ paayā

hamārī umr kuchh ġhaflat meñ guzrī kuchh nadāmat meñ

bane ho KHak se to KHaksari ho tabiat mein

tabiat aisi banti hai to banti hai mohabbat mein

bahae jao aansu umr-bhar us ki mohabbat mein

ki aise log moti ke mahal pate hain jannat mein

kaha hazir mein kuchh hujjat nahin phir muddaa puchha

sitamgar ne palaT di baat ab hazir hai hujjat mein

kisi se apne haq mein kuchh suna bhi hai to jaane do

bura to baadshah ko bhi kaha karte hain ghibat mein

mohabbat ki zara si baat par itne KHafa kyun ho

hua karti hain aaKHir saikDon baaten mohabbat mein

nahin la sakta har ek kohkan farhad ki qismat

KHuda baKHshe baDa insan guzra chhoTi ummat mein

teri har ek taswir ek ada-e-KHas rakhti hai

kare kya farq ab koi zarurat aur zinat mein

ye kya sail ke munh par toD kar TukDa sa rakh dena

are bande KHuda ko munh dikhana hai qayamat mein

jo badle dost ka bhes us ko dushman kis tarah jaanon

gaya hazrat kalim-ullah ka naqqal jannat mein

mohabbat be-itaat ek dhoka hai mohabbat ka

mohabbat ka jo dawa hai to koshish kar itaat mein

mohabbat aur mehnat kohkan ne ye bhi ki wo bhi

ulaT hai ek nuqte ki mohabbat aur mehnat mein

safi' duniya mein jine ka maza kuchh bhi nahin paya

hamari umr kuchh ghaflat mein guzri kuchh nadamat mein